A tul huna ‘No’ ti ngam…

Chief minister chuan thil tha lo hnawl ngam, a tul huna “No” ti ngam kan mamawh che u, tiin sawrkar hnathawkte hmaah a sawi a. Mipuite rawngbawltu kan nih angin an tan awlsamna kan chhawpchhuah thiam a ngai a; lang tlang sawrkar neih ngei kan duh, tiin a sawi bawk.
He thu hi nimina Mizoram sawrkar hnuaia joint director chin chunglam zawng zawng bakah DC leh SP zawng zawng telna Inter Departmental Meeting a neihpuinaah chief minister hian a sawi a. “Tuna kan kal mek dan aia tha zawk kal dan tur in hriat phawt chuan ziakin ka hnenah rawn thlen ang che u,” a ti bawk.
Chief minister hian sawrkar hnathawkte inkarah service inepna a nasa tih sawiin hei hian thawhhona a tichhe nasa nia a hriat thu a sawi bawk.
Chief minister thusawi atang hian sawrkar hnathawkte dinhmun, kalphung leh hlimthla a lang chiang thawkhat a tih theih awm e. A tul huna “No” ti ngam lo an awm thin tih a lang a, sawrkar kalphungah langtlang tawk lo a awm thin tih a lang bawk a. Service inepna phei chu a awm a ni satliah mai lova, a ‘nasa’ tiin a sawi nghe nghe a ni.
Sawrkar hnathawkte hi ramin hma a sawn leh sawn lohah mawhphurhna sang tak nei an ni a, politician-te ai mah hian an mawhphurhna hi a sang zawk awm e. Mahse, chu mawhphurhna chu an hriat chian tawk loh avangin kum nga dana inthlak thin politician-te ngaihdan ringawta awm tur emaw an ti thin em maw ni.
A nihna takah chuan sawrkar hnathawkte hi an thiamna kaihhnawih hna thawk thei tura thiamna lama ‘qualified’ bik thlankhawm an ni. Ram hruaitu politician-te hnena tihdan tur hrilha, ramin hma a sawna a changkan theihna tura an thiamna hmang tangkaia politician-te thurawn pe tura mipui sum senga hlawh tha tak neia ‘rawih’ an ni. An hna ber chu, ram leh hnamin hma a sawn theihna tura an thiamna hman/chhawr tangkai a ni. A thiam lo leh a hre lo zawkte ngaihdan dik lo pawh “No’ ti ngam lo sawrkar hnathawk an nih chuan ram hian hma a sawn ngai dawn lo tihna a ni.
Kan ram hian hma a sawn chak em? Hmasawnna sum hman dan a dik lo tih hre reng chunga ‘No’ ti ngam lo an tam vangin kan ram hian hma a lo sawn thei ngai lo tihna a ni em?
Service inepna a nasa anga sawi pawh hi a vanduaithlak hle. Sawrkar hnathawkte hi ram leh hnam hmasawn nana an thiamna hmang tangkai tura rawih an ni a; tha taka thawkho tur an ni. Hlo thlawhnaah hnathawkte hi innek per innek per ta mai se, buh hmun chu a hnim ang a, buh a thar hlawk hauh lovang. Sawrkar hnathawkte thawh dan azirin ram hian hma a sawnin a sawn lo mai dawn a lo ni.