Ke Huy Quan a Oscar dawnin hun hlui

Oscar-a best supporting actor award a lak hnuah Ke Huy Quan chuan naupang a nih laia lawng hmanga Vietnam chhuahsana Hong Kong refugee camp atanga California an luh thu a sawi a.
“Refugee camp-ah kum khat hun ka hmang a, chutah Hollywood-a stage lian berah hian ka inlan a nia,” tia sawiin, “Hetiang chanchin hi chu movies-ah chauh hmuh tur a awm an ti a. Ka laka a thleng hi rin harsa ka va ti em. Hei hi American dream a ni,” tiin a sawi.
Vietnam mi Oscar dawng thei hmasa ber niin kuminah pahnihin nomination an hmu thung a, pakhat chu The Whale changtu Hong Chau niin ani pawh an chhungkuaa lawng hmanga Vietnam chhuahsan raltlan tho an ni.
Vietnam-ah erawh sorkar atangin emaw a Oscar dawn lawmpuina emaw a reh hle. Media te pawh sorkar thunun deuh vek a nih avangin Ke Huy Quan emaw a chanchin emaw sawi a awm lo hle bawk.
Media thenkhatte erawhin Ke Huy Quan chu Chinese thlah tiin an sawi thung a, Vietnamese a nihna aimahin chu chu an sawi lar zawk. Kum 1971 khan Vietnamese capital Saigon-a piang niin Chinese minority sumdawnna lama hlawhtling tak chhungkua a seilian a ni a, South East Asian khawpuiah te chuan Chinese ethnic te hi a hlawhtling ber ber an ni fo. Eng media mahin refugee nia Vietnam tam tham taka ‘boat-people’ tia chhuahsan ho zinga tel tih an tarlang lo.
Thanh Nien newspaper chuan “Kum 1971 khan Chinese family ah Ho Chi Mindh City (Tun hmaa Saigon) ah a piang a, kum 1970 tawp lamah US ah an pem,” tiin a ziak.
Tuoi Tre chuan, “Quan Ke Huy hi kum 1971-ah Vietnam-ah Chinese family a piang a ni a, a nu hi Hong Kong chhuak niin a pa chu mainland China mi leh sa a ni,” tiin z iak thung a.
VN Express chuan “Cho Lon area ah Chinese parents a nei” tiin a sawi a. Cho Lon area hi Saigon a commercial district ethnic Chinese te tamna a ni.
Vietnam sorkar chuan engmah sawi a nei lo va, mahse ch chu sorkar lai Communist Party ze pakhat a nih avangin mak tia sawi tur a ni lo. Eng vangin nge Vietnam chhuak a nih langsar taka sawi lang ngam a, khawvel huapa mi lar hlawhtlinna chu uksak vak lo nge an nih le?
Kum 1970 leh 1980 chho vel kha Vietnam history a hun thim ber laia ngaih niin lawng hmangin mi tam takin Vietnam an tlanchhiatsan hun lai a ni. Vietnamese 1.5 million vel, a tam ber ethnic Chinese te chuan Vietnam an chhuahsan a ni.
UNHCR chuan heng Vietnamese lawng hmanga raltlan zingah 200,000 atanga 400,000 vel te chu pirates te kutah an thi an ti. Communist party te, khatihlaia United States ang ram ropui tlawmtute chuan tun hnaiah economic growth turu tak an tawng mek a, raltlan tam hunlai history kha theihnghilh an duh niin chutak chu Ke Huy Quan a Oscar dawn chuan thil hlui a phawrh chhuah leh phah bawk si a ni.
Vietnam ‘boat-people’ an tih mai te kha Vietnam leh a thenawm ram lian China te inkara boruak mumal lo tak pholanna a nia sawi a ni bawk. Communist ram pahnih niin World War II lai khan inkawmngeiha inhnaih tak an ni a, Chinese chuan North Vietnam chu French leh a hnuah Americans te nena inbakkaihna an neihah a pui nasa hle.
Mahse, kum 1975 April thlaa North Vietnam-in chakna a chana an ram inzawm lehna reunification a awm khan China nena an inkar chu a khi chat thui hle tawh thung. A chhan ber pawh Vietnam communist leader te chuan Soveit Union hnaih chu China belhbul aia an thlan zawk vang a ni.
Chu boruak rip tak hnuaiah chuan Vietnam a Chinese population thahnem tak Cho Lon a awm te chu tibuai nasa in chung zingah chuan Ke Huy Quan family te pawh chu an tel a. South Vietnam a capitalist group te chuan North Vietnam a communist te lakah rinawm an intiam tak bawk si avangin boruak a danglam a, mi tam tak te chuan re-education camp-ah tirh luh an ni nghe nghe a ni.
Indona reh hnuah pawh Vietnam economy chu hun rei tak a chhe hle a, indona avanga chikhatna bakah khawvel ram ten an socialist policy avangin an kawmserh bawk si a ni. Chutih laiin ethnic Chinese te chuan official te thama lawng hawh turin sum an nei thung a, hei vang hian September 1978 atang khan tam tham takin Vietnam an chhuahsan a ni.
Ethnic Chinese tena Vietnam thuneitute hlaua an tlanchhia nen Chinese-in February 1979-ah Vietnam a bei zui nen anti-Chinese boruak a lian hle a, hei hian kum sawm tam a daih zui a ni. Vawiin thlengin Vietnam leh Chinese inlaichinna a la tha tak tak thei lo zel bawk. Mahse, khatih laia Vietnam chhuahsantu raltlante Viet Kieu tia kohte chu Vietnam a an let leh remtihsak an ni thung a, mi tamtak an let leh reng a ni.
Mahse, China-in South China Sea a thliarkar a ram anga a chhala a huangtauna leh economic lama a inlulinna chuan Vietnam ramah tun thlengin anti-Chinese sentiments a la siam zui zel thung.
“Ke Huy Quan hi Vietnamese thlah a ni lo, Chinese-Vietnamese niin Vietnam apiang mai a ni a. Chu chu kan chian a ngai,” tiin Vietnamese pakhat chuan a sawi a. “Chinese-American, Vietnamese khua leh tui nihna nei thin tiin an ziak tur a ni a. Amahah Vietnamese origin nihna ka hmu lo,” tiin an ziak lang bawk.
Chutihrualin thenkhatte chuan “Vietnama a piang a ni a, Chinese thisen kai ni mah se Vietnamese kan ti thei a lawm,” an ti ve thung.
Ho Chi Minh City-a writer Tran Tien Dung thung chuan Ke Huy Quan identity chu “Saigon-Cho Lon” tiin a sawi a. Quan Ke Huy hi a pianna Saigon-Cho Lon chhuak niin United States a seilian a ni a. A hlawhtlinnaah ka lawmpui a, social media ah pawh ka lawmpuizia ka pholang a ni, tiin a sawi.
“State media tena boat-person a nihna Ke Huy Quan history an ngaihthah hi a pawi a ni” tiin Nguyen Van Tuan, University of New South Wales, Sydney a professor of medicine chuan a sawi a, amah pawh boat-person hlui tho a ni bawk.
“Kum 1970 leh 1980 chhova boat-people te history a Vietnam history a hun lungchhiatthlak a ni. Vietnamese refugeees te khatih laia US lutte kha Chinese thlah an ni emaw Vietnamese pure an ni emaw an rethei em em a ni. English an thiam lo va, tichung chuan an damchhuak a, hma an sawn zel a ni,” tiin a sawi.
“Vawiina Vietnam generation tharte hian khatih laia refugee te tawrhna kha an hrethiam tawh lo, a chhan chu kan history-a hun thim ber lai leh lungchhiatthlak em em lai zirtir leh hrilhhriat an nih loh vang a ni,” tiin a sawi.