Ke lawnga vura tlanin record siam

Vawt tuar chu a chak ve khawp ang, ke lawngin, kawr pawh ha lo lehnghalin vur chungah a tlan a, vur chunga half marathon tlan thleng rang thei ber record a siam. Half marathon chu km 21 vela thui a ni thin.
Amah chu Czech Republic chhuak, Josef Salek a ni a, vur chunga kelawnga half marathon tlan thleng rang thei ber record thar a siam a, vur chunga km 21 athui hi darkar 1 leh minute 50 leh second 42 chhungin a tlan thleng hman. A hmaa hetiang record chu 2007-a Wim ‘The Iceman’ Hof siam niin, ani hi darkar 2 leh minute 16 leh second 34 chhungin a thleng hman a, a record hi kum 16 chhung zet khum tu nei loa a din hnuah Josef hian a rawn khum ta a ni.
Josef hi Guinness World Record-ah a mikhual tawh bik lo a, nikum khan abdominal plank tirei thei ber record siamin, darkar 9 leh minute 38 leh second 47 chhung planking a tithei a ni.
Josef hi therapist, lecturer leh personal developlent coach niin, Joska tiin an ko mai thin a, exercise lak nuamti chi, hriselna lama hawi harh leh hetiang lam ngaipawimawh zet mai a ni a, tuna record siam tuma a inbuatsaihnaah hian record siam tuma a thawh chuah hma ni 14 chhung chu nitin bucket-a vur a dah khawmah a ke chiahin vawt tuar a zir thin.
Vur chunga kelawnga tlan hi a vawh mai bakah a nal em em a, chuvangin tlan chak pawh har tak tur a ni a, Josef pawh hi a ngil tawpa tlan loin zigzag deuhin a tlan thin.