Kelly Clarkson-i’n a ‘ex’ a khing let

Kelly Clarkson leh a ‘ex’ Brandon Blackstock leh Brandon-a pa Narvel Blackstock management company te inkar thu chuan chhiat lam a pan belh zel a, Kelly hian a ‘ex’ leh a pa hi a khing let ve leh ta.
An inkar buaina hi court lamah pawh kum thum chuang an chai tawh a, court-in Brandon leh a pa Narvel Blackstock te management firm chu Kelly manager-a Brandon a tan laia Kelly hnen atanga commission an lo dawn tawh dollar maktaduai 2.6 pe kir leh turin a ti a, mahse, he court thutlukna hi Narvel te pafa hian court sang zawkah an zualko pui leh a, tunah chuan Los Angeles Court-ah Kelly pawhin a ‘ex’ te company Starstruck Entertainment te chu a khing let ve leh ta bawk. Kelly hian 2007-2020 chhungin a pasal then tak Brandon leh a company te hian labor law an bawhchhia niin a puh a, talent agency anga thawh theihna license an nei lo chungin talent agency angin an thawk niin a puh ve leh ta a ni.