Kendrick Lamar ‘Not Like Us’ a Hot ber

Kendrick Lamar leh Drake rap battle chuan Billboard Hot 100 chart a thleng ta rawk rawk mai le. Lamar-a’n Drake a kahna hla ‘Not Like Us’ chu kar khat chhunga US-a hla lar ber niin, Billboard Hot 100 (singles) chart-ah a No.1 a, a hla dang ‘Euphoria’ chu No.3 niin, Drake hla ‘Family Matters’ chu No.7 a ni bawk. Hei bakah hian Future, Metro Boomin leh Lamar te thawhhona hla, he chart-a kar thum lo No.1 tawh ‘Like That’ chu chart No.6 a la ni bawk a, thian tunkar Hot 100 chart top 10-ah Lamar hian hla pathum a nei ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio & official video), radio airplay leh sales data te chu tehna pawimawh a ni.
Kendrick Lamar ‘Not Like Us’ hian kar khat chhungin stream maktaduai 70.9 leh sales 15,000 neiin, radio airplay-ah pawh ngaithlatu maktaduai 5 a nei tling a, hei hi chart-ah a No.1 pui ta a, Lamar tan he chart-a No.1 thei hla pali a neihna a ni a, chart top 10-a lang thei hla 15 a nei tling tawh bawk.
Rapper inkarah hian neuh neuh a awm thei khawp mai a, hla hmanga inkah leh indeuhsawh te pawh an ching khawp mai. March thlaa an tihchhuah ‘Like That’-ah khan Lamar hian Drake leh J Cole te chu a rawn hma deuh hmiah hmiah mai a, heta tang hian rap hmangin an chhang tawn ta zak zak mai a ni.
Tommy Richman ‘Million Dollar Baby’-in stream maktaduai 58.3 leh sales 6,000 neiin, radio airplay-ah ngaithlatu maktaduai 1.9 a nei bawk a, hei hi chart-ah a la No.2 pui thei a, he hla hi he chart-a lang thei hla a neih hmasak ber a ni.
Kendrick Lamar hla dang ‘Euporia’-in stream maktaduai 49, sales 7,000 leh radio airplay ngaithlatu maktaduai 1.9 neiin, chart No.11 atangin No.3-ah a invawrh. Lamar-a hla dang Future leh Metro Boomin a thawh puina ‘Like That’-in stream maktaduai 34.2, sales 3,000 leh radio airplay ngaithlatu maktaduai 29.4 neiin, No.8 atangin No.6 a kai thar leh ta a ni.
Chart No.1 hlui, Taylor Swift ‘Fortnight’ featuring Post Malone chu No.1 atangin No.4-ah a tawlh a, Shaboozey ‘A Bar Song (Tipsy)’ chu No.3 atangin No.5-ah a tawlh ve ta bawk.
Drake hla thar ‘Family Matters’-in stream maktaduai 38, sales 5,000 leh radio airplay ngaithlatu 6,46,000 neiin, No.7-ah a debut. Drake hian he chart top 10-a lang thei hla 78 a nei tling ta a, he chart top 10-a lang thei hla ngah ber a nihna sawhnghet leh ta sauh a ni.
Sabrina Carpenter ‘Espresso’ chu No.4 atangin No.8-ah a tawlh a, Benson Boone ‘Beautiful Things’ chu No.5 atangin No.9-ah a tawlh a, chart No.1 hlui Teddy Swims ‘Lose COntrol’ cu No.6 atangin No.10-ah a tawlh ta bawk.