Kendrick Lamar & SZA ‘Luther’ a Hot ber

Kendrick Lamar & SZA ‘Luther’ a Hot ber
Kendrick Lamar leh SZA ‘Luther’ chu Billboard Hot 100 (singles) chart-ah a No.1 a, he chart-a kar hnih a No.1-na a ni ta. He hla hi R&B legend mual liam tawh Luther Vandross hmingchawia an tih a ni a, Kendrick Lamar Hot 100 chart-a No.1 kai thei hla paruk a neihna niin, SZA tan a pathumna a ni ve thung.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. ‘Luther’ hian kar khat chhungin radio airplay-ah ngaithlatu maktaduai 51 leh stream maktaduai 38.7 bakah sales 4,000 nei lehin, hei hi chart-ah a No.1 pui leh ta a ni.
Chart-a a zawn lova kar nga No.1 ni thei Lady Gaga leh Bruno Mars ‘Die With a Smile’ chu No.3 atangin No.2 a kai thar leh a, chart No.1 hlui, Kendrick Lamar hla dang ‘Not Like Us’ chu No.2 atangin No.3-ah a tawlh a, Lamar hla sang ‘TV Off’ featuring Lefty Gunplay chu No.4-ah bawk awm lehin, chart-a kar 19 No.1 ni thei Shaboozey ‘A Bar Song (Tipsy)’ chu No.9 atangin No.5 a kai thar leh ta bawk.
Chart No.3 pawh lo ni tawh Rose leh Bruno Mars ‘APT.’ chu No.7 atangin No.6-ah a insawn leh hret a, Billie Eilish ‘Birds of a Feather’ chu No.8 atangin No.7-ah insawn lehin, chart top 10 atanga chhuak tawh, Chappell Roan ‘Pink Pony Club’ chu No.11 atangin No.8 a kai thar ve leh ta bawk.
Chart No.1 hlui Teddy Swima ‘Lose Control’ chu No.12 atangin No.9 a kai thar leh ta a, he hla hi chart-ah kar 80 a lang tling ta a, Warner Records tihchhuah hlaah chuan he chart-a lang rei ber a la ni a, a nawlpuia lakah pawh he chart-a a zawna kar 80 chian lang thei hi hla dang pathum Glass Animals ‘Heat Waves’ (kar 91), The Weeknd ‘Blinding Lights’ (kar 90) leh Imagine Dragons ‘Radioactive’ (kar 87) chiah a la awm.
Kendrick Lamar hla dang, chart No.1 hlui ‘Squabble Up’ chu top 10 khartu niin, No.5 atangin No.10-ah a tawlh ve thung.