Kendrick Lamar & SZA ‘Luther’ a la Hot ber

Kendrick Lamar & SZA ‘Luther’ a la Hot ber
Kendrick Lamar leh SZA hla hit ‘Luther’ chu Billboard Hot 100 (singles) chart-ah a No.1 a, he chart-ah hian a zawnin kar 11 a No.1 tling ta a, Puff Daddy leh Faith Evans ‘I’ll Be Missing You’ (featuring vocal group 112)-in 1997-a record a lo siam tawh, solo artist mipa leh hmeichhe duet-a he chart-a No.1 ni rei ber an nih rual ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Luther’ hian kar khat chhungin radio airplay ngaithlatu maktaduai 67.9 a la nei thei a, stream maktaduai 20.5 leh sales 2,000 a la tling thei bawk a, hei hi a zawna kar 11 nan chart-ah a No.1 pui leh ta a ni. A hla thupui ‘Luther’ tih hi R&B legend mual liam tawh Luter Vandross hming chawia an tih niin, a lyrics-ah pawh a hming hi an lamchhuak a, Lamar tan a hla he chart-a No.1 kai thei parukna niin, SZA tan a pathumna a ni ve thung.
Alex Warren ‘Ordinary’ chu No.3 atangin No.2-ah a insawn a, chart No.1 hlui Lady Gaga leh Bruno Mars ‘Die With a Smile’ chu No.2 atangin No.3-ah a tawlh a, Drake ‘Nokia’ chu No.4-ah bawk a la awm.
Chart No.1 hlui Shaboozey ‘A Bar Song (Tipsy)’ chu No.5-ah bawk awm lehin, he hla hi kar 19 No.1 theiin, he chart-a No.1 ni rei thei ber record a nihrual tawh a, tunah hian chart top 5-ah kar 43 a lang tling ta a, The Weeknd ‘Blinding Lights’-in 2020-2021-a record a siam, he chart top 5-a lang rei ber record a nih rual leh ta bawk.
Chappell Roan ‘Pink Pony Club’ chu No.6-ah bawk a la awm a, chart No.1 hlui Teddy Swims ‘Lose Control’ chu No.9 atangin No.7-ah a insawn a, he hla pawh hi top 10-ah kar 60 a lang tling ta a, he chart top 10-a lang rei thei record a siam a sawhnghet leh ta sauh a ni.
Morgan Wallen ‘I’m the Problem’ chu No.7 atangin No.8-ah a tawlh a, Benson Boone ‘Beautiful Things’ chu No.10 atangin No.9-ah a insawn thar leh a, top 10 atanga chhuak tawh Doechii ‘Anxiety’ chu No.12 atangin No.10 a kai thar leh ta bawk.