Khalistan tantu ruhkawlten zirlai sawisa

India mi zirlai kum 23-a upa chu Australia ramah India mite vek Khalistan hantu pawl ten an thiltih dodal zawnga a chet avanga sawisain iron rods tein an vuak thu chanchinbu mite chuan Zirtawpni khan an sawi.
He thil thleng hi Sidney khawpui Merryland veng hmawrah niin zirlai naupang hian a hnathawhna hmun tur pana a kal lai mek niin kut thlaktute hian “Khalistan Zindabad” tiin an au rual a ni. Zirlai naupang kut tuar chuan, “Ka motor chhungah ka hhu lut chiah tihin Khalistan hantu pawl hhenkhat te chu khawi emaw ahangin an lo kal a, an zinga pakhat chuan vei lam kawngkhar chu rawn pawt hawngin ka mit hnuaia ka biang ki vei lamah iron rod hmangin min rawn vua a ni,” tiin a sawi. He zirlai naupang hi motor khalh chunga inhlawh pah bawk a ni a, amah kut thlaktute zinga pahnih hian video record an neih thu a sawi bawk.
Khalistan hi India ram Punjab a Sikh hnam firfiak pawl niin Sikh hnam tana ram hran din ngiattute an ni. Buaina siamtute hian ‘Khalistan Dam reng rawh se’ tiin an au reng ni a sawi a ni bawk. “Minutes 5 chhungin engkim mai a thleng vek hman a, min khawihtu te chuan tun hi Khalistan duh loh zawnga khawsak pawizia entirna chauh a nih thu sawiin min kalsan ta a ni,” tiin zirlai naupang chuan a sawi. He thil thleng hi New South Wales Police te hriattir nghal niin naupang hliam hi damdawi in lamah hruai nghal a ni a, a lu, ke leh kutah te hliam a tawrh thu report a ni.
Merryland MP chuan, “Kan khawtlangah firfiak pawl ten tharum an thawh engti kawng mahin kan phal lo a ni. He thil thlenga mawhphurtu tur thuneitute ka be nghal a, zep miah loa thil thlen dan puanga vil reng turin ka hrih a ni,” tiin a sawi. India sorkar chuan Australia sorkar chu be vatin Khalistan firfiak ten India do zawnga chet an thawh fo ti tawp tur leh Australia rama Hindu temple beih a ni fo chu ti tawp turin India chuan a ngen a ni.