Khaw vawt karah intihlumna hmanruain thihna thlen tam

Khaw vawt karah intihlumna hmanruain thihna thlen tam
Khaw vawt vin takin India hmar lam a tuam mek laiin intihlumna hmanrua chu mi tihlumtu a ni mek a. Tun thlasikah hian thla liam ta chhungin Jammu & Kashmir bakah Delhi, Punjab leh Bihar-ah intihlumna hmanrua avanga thihna a thleng ta nual.
Pathianni khan Punjab-a Tarn Taran-a nupa tuak leh an naute chu an mut laia inkhar phui veka mei an chhem hnuah thawchhamin an thi tih police-in an sawi.
India-ah hian lungalhthei hala ai hi an ching a, hei hi thil hlauhawm tak a ni a. Hei bakah hian intihlumna hmanraw dang, electric hmang chi pawh carbon monoxide a tihchhuah nasat theih avangin thawchhama thihna thlen thei a ni.
Delhi-a Mukundpur-ah nupa leh an fanu chu kar kal ta Thawhlehni khan an in kangah an thi a. Police chuan an pindana room heater puak emaw, electric kal sual vanga kang niin an ngai a, kangmei a chhuah hmain meikhu avangin an vaiin nikhawhrelovin an awm hman tawh niin an ring.
An thenawmte chuan an zavai hian khumah tha taka an mu ruang hmuh a nih thu an sawi a. Pa ber farnu pawhin engmah a hmain harsatna an neih a hriat loh thu a sawi.
Bihar-a Gayaji-ah pitar kum 60 mi leh a tute pahnih chu an mei chhem atanga an in kang kaiin an kang hlum bawk.
Tarn Taran, Punjab-ah Pathianni khan nupa leh an fa sen an kang hlum bawk a. Srinagar-ah ei siam nupa leh an fate pathum chu an pindanah thawchham vanga thiin hmuh an ni bawk.
Mi thiamte chuan carbon monoxide (CO) hi rawng nei lo, rim nei lo leh tuina nei lo a nih avangin ‘a ruka mi thattu’ tiin an sawi thin a, an hip tih hriat a nih chuan a lo tlai hman tawh thin tih an sawi a. Chest Disease Hospital, Srinagar-a mi, Dr Naveed Nazir Shah chuan thing, boruakalhthei leh lungalhthei pawh ni se, kang turin pindana oxygen an mamawh a, boruakalhthei hlauhawm chi, CO leh carbon dioxide an tichhuak thin thung tih a sawi.
Rajesh Kumar-a kaihhruaia AIIMS New Delhi-a zir chiangtute chuan kum 15 liam ta chhunga thlasik laia CO avanga thi 95% chu boruak chhuahna awm tha lo hmuna lungalhthei hal avanga thawchhama thi an nih thu an sawi.
Doctor-te chuan thihna a thlen loh pawhin intihlumna hman nasat hi a tha lo tih an sawi a. Narayana Hospital, Jaipur-a senior consultant, Dr Ambrish Kumar Garg chuan intihlumna hmanruate hian boruaka hnawng an ei ral a, hrawk, hnar leh vun ro a siam nasa a. Chu chuan thawhah leh allergy dang a thlen a, a na zualah phei chuan thluaka thisen put thlengin a siam thei niin an sawi.