Khawpui hnatlang runpui

Aizawl Municipal Corporation bultumin kar kalta Zirtawpni khan Scouts & Guides chuan Aizawl khawpui thenfai hnatlang an nei a. Pawl hrang hrang, kohhran hrang hrang leh a khawtlang huap ang pawhin, eng lai mai pawh hian ‘bawlhhlawh thenfai hnatlang’ nei tawk hi an awm deuh reng a. Bawlhhlawh thenfai hnatlang hian tawpin tai a nei dawn ta lo niin a lang. Chumi awmzia chu, kan paih hnawk sauh sauh a, kan thianfai leh thin. Kan motto hi “Paih darh la, thianfai leh rawh” tih niawm tak pawh a ni ta.
Heti reng reng hi chuan fai hun kan nei dawn lo tihna a ni a, kan kalphung her danglam tumna nei si lova, ‘paih’ leh ‘thenfai’ ringawt hi chuan engtikah mah ram ropui min thlen hauh lovang.
Fur kan hmabak mek a, ruahtui a tlak huna bawlhhlawh rawn irhchhuah dan hi kan hrechiang (by-heart) vek tawh. Tuiluankawr ni reng si, thal laia bawlhhlawh paih nana kan hman tlat avang leh, bawlhhlawh paihtu tur motor ruai reng chung si a, a paihna tur hmun ni lo kawmkar leh kawr vela bawlhhlawh kan paih thin avangin, tuihawkin kan kawngpui dung leh khawlaiah a rawn vawrh chhuak a, chu chu a thianfaiin kan buai phili leh a. Kan heti kum tin thin tih pawh kan hriatna a rei tawh, mahse he kalphung tih tawp tuma ‘beihpui thlak’ erawh kan ngaihsak leh chuang lo.
Kan lui tui tibawlhhlawhtu hi lui dunga ram kalte bawlhhlawh paih a ni vek seng lo tih a lang a. A nihna takah chuan khaw chhung atanga bawlhhlawh, a paihna tur hmun ni lova thehthang, kawr ruama tling khawm, tuihawkin lui lama a len luh hi kan lui tui tibawlhhlawhtu lian ber chu a nih a rinawm.
Chuvangin, thal khaw that lai hian, vawikhat na reng reng chu, khawpui chhunga veng zawng zawng hian a rualin thenfai hnatlang runpui hi nei ila, kan khawpui hi chu a fai kuarhin a rinawm a. Mahni awmna area theuh vawng fai zui turin bawhzui nghal chat bawk ila, chutianga kan tih zel chuan kar lovah khawpui hi kan tifai thei maiin a rinawm.