Khawpui leh thingkung

Sipai chhuahsan Aizawl Lammual chei that hna thawh mek a ni a, Bazar Bungkawn leh Dak Inpui inkar kawngpui chu metre 14-a tih zauh tura ruahman a ni. Kawngpui tih zauhna tur chinah hian thingkung lian leh upa tak tak kih thluk tura ruahman a ni awm e. Hei hi Centre for Environment & Social Justice chuan an phal lo va, nimin khan thing kih hna thawktute an dan avangin hna chawlhsan lailawk a ni a.
CESJ hian thingkung hi kit lova phun sawn tur leh kawngpui laia thingkung chu awmtir mai turin an ngen a, Mizoram Pollution Control Board hnenah pawh boruak thianghlim siamtu thing kit lo tura ‘stay’ turin an ngen bawk a ni.
Thingkung pawimawhzia hi kan hretlang viau tawh awm e. Thing leh hnim hringte hi mihringin thawk nana kan mamawh bulpui ber, a lova kan awm theih loh boruak tha (Oxygen) siamtu a ni a. Thing leh hnim hringte hian boruak tha Oxygen an siam pah hian boruak chhia (carbon dioxide & greenhouse gases) an hip ral nghal zel bawk. Ramngaw leh thlaler khaikhin ila, kan hrethiam mai awm e.
Aizawl hi ralkhat atangin han thlir ila, building a lang thut a, building han hliah thei khawp thing ding a awm meuh lo. Tuna sipai chhuahsan ram chinah hian thing ding a tam a, hei hian Aizawl boruak pawh a siam tha a, boruak vawng daitu ber pawh a ni a; ‘Aizawl Chuap’ tih a ni nghe nghe.
Kawngpui zau hi Aizawl hian a mamawh tih chu tlang hriat a ni. Tuna sipai chhuahsan ram thenkhat sat thlaa kawngpui zau zawk siam tum pawh hi thil tihawm tak a ni. Chutih laiin, kawng laih zauhna tur chin hi a thui loh avangin traffic harsatna hi a kian phah duak chu a rinawm loh a, chutih laiin, Aizawl lammuala mipui punkhawmna tur chi infrastructure thar a awm nual dawn avangin, helai china kawngpui zau hian harsatna tam tak chu a chhawk zangkai ang tih erawh a rinawm.
Hetih lai hian, tuna kihthluk tur zinga thingkung lian leh upa tak tak ang te hi chu kit thlu lovin kawngpuiin a sir tawn tawnah vet ta mai se, hlim nuam tak siamtu a nih dawn bakah khawpui cheimawitu a ni nghal ang a, tourist mit latu tha tak a chang thei maiin a rinawm.
Helai hmun chei thatna tura thing kihthluk ngai 176 zet mai a awm hi a uiawm tham dawn hle mai a, a vaia zuah vek theih chu a ni kher lo a nih pawhin, thingkung a tam thei ang ber zuah chunga her rem hram dan ngaihtuah a tha khawp ang. CESJ lam pawh hian a thing nazawng humhalh vek theih a nih lohna chin te pawh hriatthiampui ve se, thing a tam thei ang ber zuah chunga hmalak dan tur sawiho leh a tha khawp ang le.