Tlawm chunga tlang Atletico!

Tlawm chunga tlang Atletico!
Barcelona khelmual first leg-a si hnih faia chak tawh Atletico Madrid chuan Thawhlehni zan UEFA Champions League quarter-final second leg-ah 1-2-in an mikhual Catalan team hneh lo mah se Nou Camp-a an result hlawhchhuah hmang khan khelh hnih belhkhawmah 3-2 hnehna changin semi-final an lut zawk lel!
Atletico hian Champions League knockout stage bika Barca an hmachhawn tawh vawi thumah chak zawk nihna an chang vek a, tualchhung league-a hmahruaitu Catalan-ho hian Europe kawtkaiah Madrid club tenau zawk hi an ngam lo laklawh tlat!
Riyadh Air Metropolitano khelmuala mipui 69,268 pungkhawm hmaah Thawhlehni zan khan goal thun thuai thuai mamawh mikhual team tan an thiampuipa Lamine Yamal chuan tan atanga minute lina lekah Ferran Torres siamsak hmangin goal hmahruai a khung mai a; minute 24-ah Dani Olmo chhawpsak atangin Torres hian Barcelona goal hnihna a thawh ve leh a, heti chinah hian first leg nen chhiarzawmin team pahnih hi 2-2-in an inhnehtawk phawt.
Darkar chanve an khel pel hlek tihah Ademola Lookman chuan Marcos Llorente chhawpsak atangin he match-a Atletico Madrid goal neih chhun leh 3-2 aggregate hnehna an channa goal ni zui ta a thun a, Diego Simeone-a team Atleti an tlang phah ta a ni.
Second half-ah Torres chuan mikhual goal khat thun leh bawk mah se offside avangin hnawlsak a ni a; Barca tlawm hreh beilet a nat chhoh zual hun tur minute 79-ah through ball an um laia Atleti striker Alexander Sorloth laka a foul avangin an player Eric Garcia hnawhchhuah a ni kha Barca attack tizuaitu pakhat a ni.
Barcelona hian forward luhtir hum hum mah se Robert Lewandowski leh Ronald Araujo-te chuan tauhluh theihna hun tha an bawhpelh a; Atleti hian semi-final lamah he thu buatsaih laia chak zawk la hriat loh nizana inhmachhawn Arsenal leh Sporting CP inkhela chak zawk zawk an tum leh ang.
Kum 2016 hnu lama final la lut leh ta lo Atletico-in last four an luh leh rual khan an boss Diego Simeone chuan final an luh atanga a kum 14-na a nih tawh thu leh tun thlenga a team-te an la dam chuan a tiphur takzet tih sawi chungin, “Player-te pawh an lo inthlak ta a, vawi duai lo bul kan tan tha leh thin a, Europe-ah top four hian kan chuangkai leh ta.
“Uefa Champions League semi-final kan khel leh mai tur hi a mak a, rinna leh phurna thuk tak nen kan hmachhawp hi kan bawh leh dawn a, kan chakna leh panna lai kan hria a, tu pawh hmachhawn turin kan inpeih a ni.
“Kum tam tak kan zawn leh nghah hlawhchhuak turin kan bei chhunzawm zel dawn a ni,” a ti.
Barca coach Hansi Flick ve thung chuan semi-final an luh loh boruak sawiin, “Position thenkhatah hmasawn kan ngai a, rilru paukhauh leh sukthlek hrim hrimah chuan ka team-te khan an engkim an hlan a, khati ang chiah kha kan hmuh duh pawh a ni reng a, mittlung takin an mawhphurhna an hlenchhuak a, mahse, kan beisei erawh kan hmu ta lo a ni,” a ti.
Atleti Madrid khan Champions League semi-final hmain kartawp Inrinni hian Seville khawpuia Copa del Rey final match-ah Real Sociedad an hmachhawn rih phawt ang.
Barcelona thung hian April ni 22 Nilaini zan khian La Liga lama an hmahruaina sawhngheh an tumna kawngah Celta Vigo an mikhual ve thung dawn a ni.