Khawpui tihfai leh bawlhhlawh buaipui dan turah tangho dawn

Urban Development & Poverty Alleviation department, Aizawl Municipal Corporation leh Aizawl Smart City Limited chuan khawpui chhunga faina atana hmalakna leh bawlhhlawh buaipui dan turah tanhona tur thuthlung an ziak.
UD&PA minister K Sapdanga hoa thawhhona thuthlung ziahin a ken tlangpui chu – khawpui kawtthler leh mipui vantlang hmun bakah lui leh kawr bawlhhlawh awm lo leh fai taka siam; mumal takin bawlhhlawh tawih thei sawngbawl chu Tuirialah kalpui mek a ni a; bawlhhlawh tawih thei lo te chu a sawngbawl dan tur leh a paihna hmun siamah chauh paih dan tur ruahman a ni. Hemi atan hian Material Recovery Facility chu Luangmual IGC hmuna din tura ruahman mek a ni. Tunhma atanga bawlhhlawh intiang vum sa te thianghlim tak leh awmze neia dehral tum a ni.
Aizawl district leh district dang pali – Kolasib, Mamit, Serchhip leh Saituala hospital leh healthcare facilities hrang hranga bawlhhlawh chu a halralna hmunah thianghlim taka tih ral tum a ni a. Aizawl bikah chuan hemi atan hian Tuirialah Common-Bio Medical Facility din niin, tunah hian thla hnih chhung atan trial nei turin ruahman a ni.
Leivung paihna mumal taka siam turin hma lak a ni a. AMC-in hmun hrang hrang an ruahman sa bakah Khatlaah leivung paihna tur thar siam mek a ni. In sakna bungraw hluihlawn paihna leh sawngbawlna tur pawh Hualngohmunah ruahman mek a ni.
He ruahmanna in a tum ber chu, sawrkar department bakah private entity leh mipui mimir tanhona hmanga Aizawl chu India ram khaw fai ber zinga siam a ni.