Khawpuia chhunga vawk vulh

Aizawl khawpui enkawltu AMC hnuaia BoC meeting chuan khawpui chhunga mihring chenna hnaih lutuka vawk vulhte titawp tura hma lak a tum a. Mihring chenna atanga feet 100 aia hnaiah vawk vulh khap ni se, tuna vawk vulh mekte ngaichangin 2024 January 15 atanga kenkawh tan nise, tiin a rel a.
Khawpui chhunga mimal chenna huang (compound) chhunga vawk vulh hi kan intihhmuh a, a lehlamah chuan vawksaah kan intodelh loh em avang hian, mamawh phuhrukna tha tak a lo nih bawk avang leh, income siamtu tha tak leh hlawk tak a lo nih bawk avangin inkhap bur a lo harsa a. Thawkkhat lai khan AMC hian municipal area chhunga vawk vulh khuahkhirhna kalpui tumin hma a lo la tawh a, mahse a hlawhtlinna hmuh tur a awm lova. Tunah pawh hian, khawpui area chhunga vawk vulh khap lam pawh ni chiah lo, chenna in atanga feet 100 aia hnaia vawk vulh khap a ni a. Chumi awmzia chu, khawpui daifem lam, veng hmawr lama chengte chuan chenna in dang awm tawh lohna dai pawn feet 100-a hlaah duhtawkin vawk an la vulh thei dawn tihna a ni a. Chenna in atanga feet 100 aia hnaia vawk vulh khap a nih chuan, khawpui chhungah vawk vulh theih a ni dawn lo tihna a ni ber awm e.
Hunthar veng leimin, a hmuna rawn enfiahtu leilung chanchin zirbing mithiamte khan, tuichhe paih dan fel lo leh, tuichhe luanna awm mumal lo kha lei min chhan (factor) zingah a tel theih thu an sawi a. An zinga pakhatin a sawi chu, Nagaland khawpui Kohima-ah pawh mimal chenna in bula vawk vulh an uar thu leh, vawk vulhna bula tuichhe paihna mumal lo, lei hnawng reng chuan hmuh phak loh lei chhungril a tihnip reng a, a tawpah a lei a lo tawlh ta mai thin a, chutiang chu hmun tam takah hmuh tur a awm, tih thu a sawi a. Aizawl khawpui chhungah pawh hian vawk vulhna hmunhma tam tak hi chu leilung tiderthawngtu an ni pha ngeiin a rinawm.
Leilung a tih derthawn theihna lam chu thuhran ni se, hriselna atan a pawi theih bakah, khawpui tirimchhetu leh titawptu a nihna ringawt pawh hi khapna siamna tham chu a ni awm e. Broiler ar vulh chungchangah pawh hian, khawpui titawptu a nih piah lamah, hriselna tichhe thei a nihna zawnah, khawpui daifem lam deuh lovah hi chuan khapna kalpui theih a duhawm hle bawk a ni.