By ZD. Lalvunga
Remna Special Report:
-- Advertisement --
Mizoram Remna leh Muanna, India leh MNF/MNA te inremna kawngzawh chhung kha kum 10 zet a nih avangin, Arakan-a MNF Provisional Gov’t-a awmte khan, Remna leh Muanna chu beisei zel dan pawh an hre seng tawh lova. Inbiakna kha a lo hlamzuih ta pawh ni se, tal buai lo turin kawng hrang hrangah hma an la nasa hle a.
Mahni intunnunna atan, Leilet-Zautak te siamin bawngchalte nen an leilette an enkawl ngawrh hle a. Sipai Section khat; fel theh thawh, officer-hovin an riahchilh reng thin a ni. khatih lai pawh khan sipai training chi hrang hrang pawh neih a ni reng a; khatia inremna lam kawng kha ping leh fail anga a awmna chhan kha inbiakna kha a hlawhchham zing lulai em a ni.
Kha vang khan MNF/MNA te khan beisei dan pawh an thiam seng bik tawh lo a ni. Inbuatsaihna hrang hrangin hma la mah se, Ningani (Thursday) apiangin tawngtai inkhawmna neih a ni thin a.
Hemi ni hi chuan hun dang aiin ngaihpawimawh a hlawh bik a ni. Chuta tawngtai thupui ber chu; “Lalpa Zoram Remna Kan Nghah hi, MNF duh dan emaw, India duh dan emaw ni lovin Nangma duh dan leh Remtihna ni rawh se” tih a ni.
Hei hi an hmuh dan tak tak pawh a ni a, 1984 kum phei kha chu hrehawm an ti hle a, remna awm mai tur anga ngaiin an inthlahdul deuh va, chutih laiin remna kha a awm ta mai si lova, ei leh barah an buai phah hle a ni. Rilrua beisei phak loh hnuah Remna rim a rawn nam ta a; A.I.R Station-in “Ka hla duhzawng” Programme-ah (Arakan-ah Zan dar 10 Pm vel a ni) June 29, 1986-ah tihian, “Zanin zanlaiah India leh MNF ten Inremna an ziak fel dawn a, TV-ah en theih a ni ang” tih a puang a; Hnam Sipai ‘L’ Bn (Lalvunga Battalion) ten an lo ngaithla fuh hlauh mai a. Hei hi an khua a har deuh thin avangin A.I.R Aizawl-hi fiah mang lo chung pawhin an ngaithla hram thin a ni.
Khami zan ber kher kha chu Battalion dang Radio Set/her an lo awm loh zan a lo ni a, ‘L’ Bn te chu mutmu pawh tuah lovin “Remna” an Sign tur chu an lo nghak thuap mai lo niin; puan lawk angin 30th June, 1986 Zanlaiah chuan ‘Remna’ chu Signed fel alo ni ta a. ‘L’ Bn. ho chu an Sahawk hle a, silai te kapin rithei zawng zawngte pawh an lo vaw ri nasa mai lo niin; chutih lai chuan Capital lam chuan engmah an lo hre ve hauh lo va.
Hnam Sipai Roll-Call-ah pawh hnathawk tur leh, an thawh dan tur an ruahman fel vek hlawm a. ‘L’ Bn hotu Lt. Col. Pu Malsawma chuan zing takah sipai tir chhuakin Capital-lam chu chanchin a hrilh ve ta a, tichuan Capital lam chuan an hre ve ta chauh a ni.
Chutia Remna Signed a ni tih an hriat veleh, Vice President Pu Zoramthanga chenna inah an tlan khawm a; an inchibai nak nak a. An lo tih dan thin angin tlachawp ro an rel ta a. 30th June 1986 hi “Remna Ni” a nih angin Hnam Sipai hmun tinah Sorkar, (Underground Sorkar Provisional Gov’t of Mizoram) chuan Holiday a puang ta a. Mahni hmun theuhvah “Pathian hnenah lawmthu sawi ni rawh se” tiin Order siam nghal a ni.
Capital-ah chuan Hall-ah tawngtai inkhawm Urhsun taka neih a nih hnuin infiamna chi hrang hrang neiin nilengin intih hlimna neih a ni a; Cabinet Team leh Army Chief Team ten football an khel a. An inchona a rei tawh bawk a. Cabinet Team chu Pu Zoramthanga’n a hova, Army Team chu Pu Tawnluia’n a ho ve thung a. An han inkhel zet mai chu(h) Army Chief lam chuan “Pre-Plan” an lo nei ru a ni awm e. Hun chanve hnu lawkah Col. Pu Nohrang ball han khalh chu Pu Rinchhana Minister-in a chuh a, chu velah Pu Nohranga chu a tlu ta a; a biak theih ta tlat loh mai a, medical lamin zawn chhuakin an bawihsawm ta a. An lo ruahman ang ngeiin Pu Nohranga aiah football thiam zet mai an tir lut ta mai a, Pu Nohranga chuan nui chungin, “Tikha chuan kan chak tawh ngei ang,” a tihkhum ta mai a. Cabinet-lam chu an hrilhhai hle a ni awm e.
Remna ni chu Capital-ah chuan hmang ve mah se, a awmzia erawh hriat chianna tak chu an nei lem lo. Chawlhkar khat hnuah Remna Palai Zing ami Pu Rualchhina chuan Capital-a thleng a, chuta tang chuan thil awmzia an hre ve ta chauh a ni. Tichuan Hnam Sipai Battalion tin C.O te chu Capital-ah Kohkhawm an ni a, Rem an ruat ta a, tahchuan, “Remna kan nei ta a, kan chhuah a tul ta si a, hna kan thawhpui turte chu, min hektute, min mana min sawiseltute an ni dawn a, keini, (MNF/ MNA) tu te mahin phuba lakna rilru kan pu tur a ni lo, ‘Remna’ a nih ang ngeiin mite va remtu kan ni tur a ni,” tih chu nasa takin an inzirtir a. “Chutih rual chuan kan tangrual thei em? Silai chheprelh mai kan awm angem? tih thlengin an ngaihtuah a ni.
Tichuan Army Chief Order angin, Battalion tina silai chu hman tlak vak loh thlengin an siam tha a. Awm dan mawi leh tul ang ang an inzirtir vek bawk a. Tichuan, 21st July 1986 (Monday)-ah an ruahman lawk angin Pu Rualchhina hovin, nunau chak lo zual mi tam tak chuan Capital an chhuahsan ta a. Pharva-ah innghahkhawm tur tih a ni a. Kal hmasa ho hi an chhangchhe hle a, kalkawnga thingluang kan tur pawh a chung leh a hnuai chu a bel zawng a inang reng a ni.
A hmasa ho an kal liam atang chuan an chhehvela Zohnahthlakte chu an lo lang tan ta a. MNF/MNA ten an thil neih tam tak, Mizorama ken theih loh tur te chu an tiral nual a, Japan siam Buhdeng khawl leh thil thenkhat pawh “Sialin an thleng vek a ni. Rana an thleng avang hian, Pharva thlengin sa eitur an neih phah a ni.
Hetianga khawchhung mite nena an indawr meuh chuan, an buhfai neihte eizawh mai a lo tul ta a. In khatah mikhual 20/30 vel nei ang an ni deuh reng a. Tichuan Army Hqrs. lam pawhin an tih turte an ti zova. Silai chi hrang hrang list leh, a tak tak a inmil em? tih an check vek hnuah a lo inmil thlap a, tute mah silai chheprelh an awm lo tih a chiang a, Remna atana Hnam Sipaite an lungrualzia a lang chiang hle a ni.
Hetih lai vel bawk hian, Tactical Hqrs. lam pawh Remna avanga hawng turin, hotupa Col.Lalrawnliana UT Commander hovin Phuldungsei lam atangin Mizoram an rawn lut ve mek bawk a, Aizawla Mizo Army te in tawhkhawmna tura ruat lam chu an rawn pan ve mek bawk a ni.
July 23rd 1986 (Wednesday) khan vice President Pu Zoramthanga hovin Arakan chhuahsan runpui chu a thleng ta a. Zing dar 10:00 (Bangladesh Standard Time) ah Capital Field-ah an chhuak khawm vek a. Pu Zoramthanga’n thusawina a nei a, Capital chhehvela Civil mite chuan MNF/MNA Mizorama hawng tur chu mittui nen an thlah a, an lung a chhe tlang a ni ber e.
Pu Lalrinchhana chuan tawngtaina neiin chu mi hnu chuan Hnam Sipaite chuan an pianna Zoram lam pan turin leh ruahman angin an kal ta a ni. An awmna khaw mipuite chuan anmahni tawngin; “Dam takin kal rawh u, min rawn theihnghilh reng reng suh u, Pathianin min hruaikhawm leh rawh se,” tiin mittui nen an inthlah liam ta a ni.
Arakan chhuahsan hun hi fur chhe lai tak ni mah se, kal harsa khawp erawh a ni lova, MNF/MNA te ten Pharva thlengin Dt. 27th July 1986 chuan India aiawh leh MNF aiawhte chuan silai leh a mu chi hrang hrangte, grenade etc. thlengin, Remna Thuthlungin a sawi angin MNF-te chuan an hlan ta vek a ni. Hnam sipai ten thlasik vawh lai ber pawha nupui anga an lo mutpui silai an han pe lut ta mai chu, anni chauh ni lo, hotu liante ngei pawhin hmuh hrehawm an ti a ni. Hnam Sipai ten mittui hru zeuh zeuh chunga silaimu an chhiar lai han hmu meuh chuan Barrack chhunga awm rei a har reng a ni. Zofaten Remna kan mamawh tawh si avangin, Remna thuthlung angin, MNF/MNA-te chuan engkim dik thlapin an ti a ni tih khawvel hriatah an pholang ta a nih kha!
The woods are, lovely dark and deep,
But I have promises to keep
And miles to go before I sleep
And miles to go before I sleep