Khawruhlian khaw din thar dan tur MLA-in a ngaihtuah

Khawruhlian khaw din thar dan tur MLA-in a ngaihtuah
Sum thawhchhuah kawnga a hnung tawlh zawnga an kal zel lohna turin Khawruhlian khaw din thar dan tur an ngaihtuah nasa tih Chalfilh bialtu MLA, speaker Lalbiakzama chuan a sawi.
Khawruhlian leh a chhehvel khuaten an thlai tharte zawrhchhuahna atan leh dahthatna atana hman tura ruahman, Roadside Agro-based Product Market building lungphum chu Assembly speaker Lalbiakzama hian Thawhlehni khan a phum a. Market sak tur chu ‘mipui project’, Khawruhlian chhehvel khua zawng zawng chhawr tur a ni tih a sawi.
Khawruhliana sum leh pai thawhchhuah kawnga hnung tawlh dawrhna, ‘economic collapse’ a thlen lohna atana khaw din thar dan tur a ngaihtuah nasa tih sawiin, “Khawchhung kawng siamthat hna thawh a ni tawh a, a tul dan azirin a hunbi pangngaiin a kal chho zel dawn a ni. Link road tha zawk siam dan leh hmun fianrial a nih avangin tourism lama hmalak dan ngaihtuah mek a ni,” a ti.
Market chawm tur tharchhuah leh lakkhawm chu awlsam zawka siam a la ngai dawn tih sawiin, market chawm tur thlai thar phurchhuahna kawng, agriculture link road mamawh a ni dawn tih bialtu MLA hian a sawi a. Market project hi a bial chhunga project hmasa ber a nih angin project awm leh zel thawktute tan entawn tlak, department mit tlung, a sak dan kawnga buk lung ni turin a duh tih a sawi a ni.
Agro-based Product Market Building sakna atan hian SASCI 2024- 2025 Part V-ah cheng nuai 300 hmuh a ni tawh a. Mizoram PWD-in contractor atan M/s Tribal Youth Construction, Falkland Aizawl thlangin, work order pek a ni tawh a, thla 12 chhunga zawh tura ruahman a ni.