Khawtlang hmasawnna atan RGSA kalpui dan tur inhrilh

Khawtlang hruaitute thuamchak a, mipui tana tangkai zawka hma an lak theihna atana sawrkar laipuiin a ruahman – Rashtriya Gram Swaraj Abhiyan (RGSA) chungchang inhrilhhriatna chu Thawhtanni khan Aizawlah neih a ni a. A kaihhnawih sawrkar department hrang hrang aiawh an tel.
RGSA hi centrally sponsored scheme (CSS) a ni a. Scheme tum ber chu, mipui aiawha thlantlin khawtlang hruaitute thiamna leh theihna tihpuna thuamchak, resources awmsa tangkai taka hman theih dan ngaihtuah chhuah leh rampum huapa scheme pawimawh tak tak tihhlawhtling theia anmahni dehchhuah, sum hailuhna an hmuh theihna atana tuaihriam a ni.
State Panchayat Resource Centre faculty Dr Rosangpuia’n a zirtir a. Department hrang hrangin scheme hrang hrang kaltlanga Sustainable Development Goals (SDG) hlawhtlin theihnan, hemi hawi zawnga hna thlan kawngah leh thawhhona tha neih a nih theihnan leh hmasawnna khairual turin, kutke ber village council-te khawtlang hmasawnna awm thei hrilhhriat a, inrawn tlanna tam zawk a awmna tura hma lak an rel a ni.
RGSA hi sawrkar laipuia NITI Aayog rawtna bawhzuiin, SDG tihlawhtling turin tualchhung sawrkar an pawimawh tih hriain, Prime minister chuan he scheme hi a tlangzarh a. Revamped RGSA duang lehin, hei hian 2022 April 1 atanga 2026 March 31 thleng a huam ang. Sum ruahman pawh cheng vaibelchhe 5911 a ni a, central share vbch. 3700 leh state share vbch. 2211 dah a ni.