Khawtlang leh ram tana in thawh rah thangtharten kan chen mek – K Sapdanga

Tuna kum upate ni ta ten an hunlaia khawtlang, ram leh kohhran tana rim taka an lo thawh rah chu thangtharte kan chen mek tih minister K Sapdanga chuan a sawi.
Mizoram Upa Pawl Chanmari Branch chuan Inrinni khan an kum 50 tlin, Golden Jubilee an lawm a. Hmanpuitu Aizawl North III bialtu MLA ni bawk K Sapdanga chuan, tunlaiah in ropui tam zawng, dawrkai tam zawng, vengchhunga officer tam zawng chu hmasawnna tehfung pawimawh a ni ta mang loa, hmasawnna leh zahawmna tehfunga hman tlanglawn chu veng fai, khawtlang lungrualna, vengchhung ralmuanna leh kohhran an hlim danah te a ni ber tih a sawi.
“Tuna kan buaipui hmasawnna leh changkanna bulpui chu vawiina kan MUP member ni mekte hi in ni. In hun laia khawtlang tan, ram tan, kohhran tan rim taka in lo thawh rah kha thangtharte hian an chen mek a, in thawhrim zarah thangtharte hian kawng awlsam zawk an zawh ve thei dawn a ni,” a ti.
Vawiina veng tan leh kan mihringpuite tana tangkai taka kan awm theih chhan chu, kan hruaitu kal hmasaten nasa taka sul an lo sut tawhna zar kan zo a ni tia sawiin, keini pawh kan la liam ve anga, kan tu leh kan faten kan zar an la zo ve dawn tih a sawi a ni.
Rual ute zarah tun amiten Golden Jubilee hlim taka an hmang ang hian, an thawhrimna leh inpekna azarah an tu kan faten MUP Centenary hlim taka an hman theih beisei turin a fuih bawk.
Golden Jubilee lawman hi MUP Gen Hqrs. president Nghaklianmawia leh AMC Ward No.V corporator Dr Lallawmkimi Tochhawng bakah Chanmari Local Council leh NGO hruaitute, MUP Area hruaitute pawhin an hmanpui a. Tlaiah jubilee ruai theh a ni.
MUP Chanmari Branch hi 1976 October 24-a din a ni a, a din tirh hian member 51 an awm. Kum 2026-ah hian member mipa 199 leh hmeichhia 346, an vaiin member 545 an awm a ni. An member zawng zawng hi life member vek an ni. Jubilee pual hian free clinic leh sports an neih bakah an member engemawzat hnenah thilpek an pe a ni.