US tuamtu thlasik thlipui chuan mi panga nunna la in khawvawt turu takin US ram zau tak la tuam zelin school te khar niin, khualzin tangkhang a siam nasa a, power cut a thlen hnem hle bawk.
US state pasarih Maryland, Virginia, West Virginia, Kansas, Missouri, Kentucky leh Arkansas te chuan emergency an puang bawk a.
Thlawhna 2,300 chuang chawlhtira awmin thlawhna thlawk tur tihkhawtlai pawh 9,000 chuang a awm bawk a, heng te hi North Pole hual thin thli vawt tak polar vortex vang a ni.
Thlipui kalkawnga state a mi 190,000 chuangin power an nei lo bawk a, khawvawt leh vur sur nasa hian north-eastern US chu a la nuai chhumzawm zel dawn niin National Weather Serivce (NWS) chuan a tarlang.
Artic boruak vawt tak hian US ram zau zawk chu kar eng emaw ti chhung chu a la tuam dawn nia sawi a ni bawk.
Khawvawt lutuk hian kawngpui te chu hlauhawm takah siamin Missouri state highway patrol te chuan Pathianni ah ringawt khan lirthei chesual 365 a awm tiin an sawi a.
Kansas ah pawh thlasik thlipui tleh lai car chesualah mi pahnihn nunna an chan bawk a.
Houston, Texas ah pawh bus stop na bul lawkah khawvawt avanga nunna chan pakhat hmuh a nih thu thuneitute chuan an sawi bawk a.
Virginia ah pawh Thawhtan khan lirthei chesual 300 chuang a awm bawk a, thuneitute chuan khua leh tuite chu lirthei lohtheihlohah tihloh chuan lekchhuak lo turin an ngen hial a ni.
Matthew Cappucci, senior meteorologist, weather app MyRadar chuan Kansas City bik chuan kum 32 chhunga vur tlak nasat ber a tawng tiin a sawi a. Ohio River te chu skating rink ah a chang tiin a sawi bawk.
Khawvawt in United States tuamzui zel
Get real time updates directly on you device, subscribe now.
Prev Post
Next Post