North Korea in missile kapchhuak leh tawh

North Korea chuan intermediate ballistic-missile a khawchhak tuipui lamah a kapchhuak leh tiin South Korea military te chun an sawi a. Tihian tun hnai thla hnih chhungin Pyongyang in missile a kahchhuah leh hmasak ber a ni.
He missile hi 1,100km a thlawh hnuah tuipuiah a tla tiin military te chuan an sawi a. North Korea chetdan chu nataka an dem thu an sawi lang bawk.
Hetihlai hian US Secretary of State Antony Blinken chuan South Korea hruaitu lawk te be tura Seoul a tlawh mek lai a ni a.
Thawhtan zinglam khan Blinken chuan acting president Choi Sang-mok hmu in Washington leh Seoul inlaichinna chu Korean peninsula a remna leh nghelnghehna a awm theih nana pawimawh tiin a sawi.
South Korea military te chuan North in missile a kahchhuah zel tur enfiahna nasa zawka an kalpui thu sawiin tuna North Korea missile kahchhuah pawh information a neih ang ang te rang takin US leh Japan a hrilh ve nghal bawk.
South Korea chuan political crisis a tawh mek lai niin President Yoon Suk Yeol chuan nikum December thla khan martial law a puan avangin suspend in a awm mek a.
Yoon hi lawmakers te chuan an impeach hnuah a presidential power te laksak a ni a, man tura tihin a awm mek a ni. Constitutional court chuan a office atanga nawrchhuah tur a nih leh nihloh a ngaihtuah mek bawk a.
North Korea chuan a hma in Yoon an martial law a puang mai chu mawlthlak tia sawisel sakin Yoon chu a mipuite lakah fascist dictatorship hriamhrei leh silai chelek tiin a sawizel zui bawk.
International community te erawhin North Korea leader Kim Jong Un chu dictator ah a ngai thung a. Kim family chuan North Korea ah hian hun rei tak thuneihna an chang tawh a ni.
Pyongyang in missile a kahchhuah hnuhnun ber chu nikum November thlaa US presidential election dawna a kahchhuah kha niin short-range ballistic missile pasarih a kapchhuak a ni.
He mi hma lawk hian South Korea leh Japan te nena trilateral military drills an neihnaah US chuan a long-range bomber te a thlawh tir a, hei hi natakin Kim unaunu Kim Yo Jong chuan a sawi sel a ni.