Khawvel huapin Bad Bunny ‘Monaco’ a lar ber

Bad Bunny hla thar ‘Monaco’ chu Billboard Global 200 chart-ah a No.1 a, he Puerto Rican superstar hian he chart-a No.1 kai thei hla pali a nei tling ta a, a hla dang pahnih top 10-ah a lang bawk.
Billboard Global 200 chart hi kar khat chhunga khawvel huapa zaithiam lar dan tehna niin, chart ranking siam nan hian khawvel ram hrang hrang 200 chuanga official-only streams (subscription leh ad-supported audio leh video services) leh download sales te chu tehna pawimawh a ni.
Bad Bunny ‘Monaco’ hian kar khat chhungin stream maktaduai 82.3 leh download sales 2000 a nei thei a, hei hi Billboard Global 200 chart-ah a No.1 pui ta a ni. Heti hian he chart-a No.1 kai thei hla pali a nei tling ta a, Drake leh Olivia Rodrigo kalsanin soloist zinga he chart-a No.1 kai thei hla ngah ber a ni ta. Soloist chauh ni loah chuan BTS-in he chart-a No.1 kai thei hla an ngah ber a, pasarih an nei tawh a ni.
Bad Bunny hian a hla dang ‘Where She Goes’ chu he chart No.1-ah hian a lo debut pui tawh bawk a, ‘Monaco’ hi chart No.1-a a debut vawi hnihna a ni. Chart No.1-a debut tih chuan chart ranking-a a lan theihna hmasa berah No.1 ni nghal tihna a ni. A hla dang pahnih ‘Un x100to’ featuring Grupo Frontera leh Jhay Cortez (tunah chuan Jhayco a inti tawh) a thawhpuina ‘Dakiti’ te an lo No.1 tawh bawk a ni.
‘Monaco’ hi a No.1 album ‘Nadie Sabe Lo Que Va a Pasar Mañana’ a hla niin, he album-a hla dang pahnih chu chart top 10 a kai pui bawk a. Feid a thawhpuina ‘Perro Negro’ chu stream maktduai 56.8 tlingin No.4-ah a debut a, Young Miko a thawhpuna ‘Fina’ chu stream maktaduai 51.7 tlingin No.6-ah a debut bawk. Heti hian he chart top 10-a lang thei hla 19 a nei tling ta a, Taylor Swift lehpelin, he chart top 10-a hla lang thei ngah ber dawttu a ni ta a, a ngah ber chu Drake niin, top 10-a lang thei hla 35 a nei tawh a ni. Bad Bunny thawhpui Feid hi Colombia lam chhuak niin, Miko hi Puerto Rico mi a ni a, an pahnih hian he chart top 10-a an lan vawi khatna ve ve a ni.
Taylor Swift ‘Cruel Summer’ chu stream maktaduai 52.4 leh sownload sales 47,000 tlingin No.14 atangin No.2-ah a invawrh thar leh a, a hmain he chart-ah hian No.3 a lo kai tawh a ni. Doja Cat ‘Paint the Town Red’ chu No.3-ah bawk la awmin, Tate McRae ‘Greedy’ chu No.6 atangin No.5-ah a insawn ta bawk.