Purunsen rit ber

Purunsen chu kan hre theuh ang, kan hmuh len pawl pawh kuttum tiat vel a ni ang. Gareth Griffin-a purunsen thar erawh a lian tha kher mai, kg 8.97 a rit niin, Guinness World Records chuan khawvela purunsen rit berah an puang a, khawvela purusen lian ber pawh a ni ngeiin a rinawm. Gareth hian a purunsen thar hi Harrogate Autumn Flower Show, North Yorkshire-ah a entir ve nghe nghe a ni.
A hmaa Guinness World Records-in purunsen rit bera an puan chu 2014-a an thar daih tawh kha niin, kg 8.5 a rit a ni a, he record hi Gareth-a purunsen thar hian a rawn khum ta a ni.
Gareth hian hetianga purunsen lian ber a thar hi lawmawm a tih thu sawiin, “Khawvela purunsen lian ber thartu han nih tak mai chu nuam ve tak mai a nia. Ka pa khan purunsen lian tak tak a thar thin a, a thih dawn thleng pawhin purusen lian tak tak a la thar reng a, mahse, record siamna khawpa lian erawh a thar lo a, tunah record siam khawpa rit kan thar ta mai hi ka tan a hlu lehzual a ni,” a ti.
Gareth-a purunsen thar hi a lian hle tih mai lohah chuan purunsen pangngai nen a danglamna pawh a awm chuang lo a ni.