Khawvel lum sanna 1.5OC-in pel mai thei dawn

Khawvel lum zel chuan a tum khat nan kum rei lo te hnuah temperature san lam bituk siam chu a pel dawn tiin scientists te chuan an sawi a.
Researchers te chuan tun atanga kum 2027 inkar chhungin 1.5oC-a global warming kan pelh theihna chu 66% in a sang mek tiin an sawi.
A chhan bera an sawi chu mihring chetvelna atanga emission pekchhuah bakah kumin kum tawp lama El Nino weather pattern thleng tur vang an ti a. Mahse, khawvel lumna hi 1.5oC-in sang mah se hun rei lo te atan chauh a nih hmel an ti thung.
A awmzia berah chuan kum zabi 19-na aiin kan chenna khawvel chu 1.5oC-in a lum tawh dawn tihna a ni a, industrialisation intana fossile fuel emission pekchhuah nasat hnuah khawvel chuan lum lam a pan tial tial a ni.
Khawvel lum belhna hi kum 10/20 chhunga kum tin 1.50C aia sang a nih reng chuan nghawng na tak nei dawnin thlipui nasa zawk te, ram ngaw kang turu zawk te leh heatwaves nasa leh rei tak tak te a thlentir thei dawn thung.
Mahse 1.6oC-a pelh ringawt hian a hmaa Paris Agreement siama 1.5oC hnuai lama dah tumna a hlawhchham tihna a ni lo tia sawiin scientists te chuan emission pekchhuah nasa taka tihhniam chuan khawvel lumna chu la tlahniam zui zel thei an ti bawk a.
Kum 2020 atang tawh khan World meteorological Organisation chuan khawvelin 1.5oC bituk a siam a khum theihna chu a awm reng tawh tih an sawi tawh a. Khatih lai kha chuan a khum theihna 20% chauh a ni a, a kum telin a sang ta tial tial a. Nikum khan 50% ah kai chho tawhin kumin chuan 65% ah a kaichho leh ta a ni.
1.5oC pelh awmzia?
He figure hi khawvel temperature tehna tihna a ni lova mahse khawvel chu long term global average nena khaikhina a lum emaw vawh tak dan chhutna zawk a ni.
Scientists te hian average temperature data chu kum 1850-1900 inkar chu tehnana hmangin chu chu tunlai khawvelin coal, oil leh gas a hman tak tak hma niin tehna behchhan berah a hmang a ni.
Kum tam tak chhung chu emission pekchhuah nasat avang hian kan chenna lei chuan 2oC a pel turah an ngai a, chu chu mihring leh khawvel tana pawi thei tak a ni a. Mahse, kum 2018 khan tehna an siam chu ennawnin 1.5oC ah an tla thla ta zawk a, chu pawh chu khawvel pum tana la pawi thei tak tho a ni.
Tun hnai kum sawm chhungin khawvel lum zel chu a nasa tial tial a, kum 2016 phei kha chu khawvel lum ber kum niin pre-industrial hma aia sangin 1.38oC lai a hawlh a ni. He figure hi scientists te chuan khumin a awm ngei dawna kum 2027 hma ngeiin khum a nih theihna 98% a awm an ti.
Chumi inkar chhung chuan 1.5oC limit chu khumin a awm theihna a sang hle an ti bawk a. Paris Agreement a hlawhtlin dawn chuan temperatuee chu 1.5oC hnuai lamah a tlem berah kum 20 tal a awm a ngai an ti bawk.