Khawvel Sunday School Ni

November 5 (Pathianni) kha Khawvel Sunday School Ni a ni a. Mizoram Presbyterian Kohhran chuan chawhma leh chawhnu inkhawmah thupui neiin zirlai an zir.
Puitlingah “Rev VL Zaithanga chanchin” Rev C Rosiama ziah an zir. Intermediate atanga Senior-in “Dietrich Bonhoeffer chanchin” Rev JH Zaikima ziah an zir a, Beginner atanga Junior-in “Zirtir Thoma chanchin” Dr Rosy Zoramthangi ziah an zir.
Mizoram Sunday School Union Committee rel angin 1944 February 16 atangin Mizoramah Khawvel Sunday School Ni hi hman tan a ni a, kum 1949 atangin November Pathianni hmasa berah thupui neiin kohhran hrang hrangten an hmang tan a ni.
Sunday School hi kum 1780-ah England ram, Gloucester khuaa Robert Raikes din a ni a. Hemi hma pawh hian mithahnemngai engemawzatin anmahni huamchhungah mumal deuh takin an kalpui tawh. Kalphung fel zawka a indin chhuahna leh a darhzau takna chu Robert Raikes hmalakna a ni. Thilsiamna hmuna thawk naupangte, ziak leh chhiar thiam lo, inkhawm ngai lote chu hruaikhawmin mimal inah ama sum senga zirtirtu ruaiin a zirtir a. Vawikhat class lakah zirtirtute hi shilling khat a hlawhtir nia sawi a ni. Kum 1805 atangin John Wesley hmalaknain hlawh neia zirtirtu rawih chu tihtawp a ni.
India ramah 1803 July 9 atangin missionary ropui William Carey leh a thiante (Serampore Trio) hmalaknain Sunday School neih tan a ni a. Mizoramah pawh Zosap Rev DE Jones (Zosaphluia) hmalaknain 1898 February 20 atangin mei mit loin a nei zui ve a ni.