Khawvela samak ki khat nei 80% dawn Assam-ah awm

Khawvel pumah samak ki khat nei 4,075 awm mekin heng zinga 80% dawn chu Assam-a awm a ni a, Kaziranga National Park-ah ringawt 2,600 chuang a awm.
Assam Forest Minister Jayanta Mallabaruah-a chuan kum 1900 chho velah khan khawvel pumah samak ki khat nei hi 100 pawh a awm tling lo va, tunah erawh chuan a vawi khat nan 4,000 tlingin hetah hian Assam-in a thawh hnem hle tih a sawi.
“India-ah hian 3,323 a awm a, Nepal-ah 752 a awm a. Assam hi samak ki khat nei humhalh leh tihpun kawngah khawvel huapin a thawh hlawk em em a ni,” tiin Mallabaruah-a chuan X-ah a tar lang.
Khawvel puma samak ki khat nei awm mek zinga 80% dawn Assam-ah awmin hei hi a humhalhna tihchak vang a ni tih a sawi.
Assam-ah hian kum 2022 khan samak ki khat nei pelh thubuai a awm lo va, hei hi 1970 hnua a vawi khatna niin nikum khan a awm lo leh bawk a. Hei hi khawvel huapa mi larte pawhin an fak a, Hollywood actor Leonardo DiCaprio-a pawhin a fak hle a ni.
State sorkar chuan kum 2000 leh 2021 inkar khan Assam-ah hian samak ki khat nei pelh thubuai 191 vel a ziak lut a. A tam ber chu 2013 leh 2014 kha niin 27 ve ve tihhlum a ni.
June, 2021 khan Assam sorkar hian Special Anti-Poaching Task Force a din a, anni hi forest leh police department tangkawp niin samak pelh tumte dan nana tih a ni.
Director General of Police (DGP) hlui chuan January, 2022 daih tawhah khan Special Anti-Poaching Task Force hi tual chhung mite nen pawh thawkhovin sa pelh tur venna kawngah hma an la ho tih a lo sawi tawh.
Assam Chief Minister Himanta Biswa Sarma chuan samak pelh chhan hi a ki duh vang niin to tak takin hralh thin a ni tih a sawi a. A ki hi rin dan atthlak thila tangkaia hman theih nia sawi a nih thu a sawi bawk a, September, 2021 khan sorkarin a man samak ki 2,500 dawn an halral a ni.