Tleirawl kahhlum vangin France buai hle

Thawhlehnia Paris khawpuia police tena traffic check an neih laia kum 17 mi an kahhlum avanga lungawilohna lantirna chuan zan hnihna kaiin mi 150 chuang manin an awm tawh a.
Paris region leh khawpui dangah lungawilohna lantir avang hian Town hall, school leh police station te chu mipui lungawi loten an hal a ni.
President Emmanuel Macron chuan mipuite chet bawrawna chu ‘thiam chan theih loh’ tia sawiin crisis cabinet meeting a nei zui a.
Tleirawl Nahel M chu hnai takah a car khalh lai kah niin a chesual zui nghal a ni.
Social media a post siamah Interior Minister Gerald Darmanin chuan lungawilohna lantir zui zelna chu a dem thu sawiin France chuan ‘zan hnih lai harsatna nasa a tawk ta’ tiin a sawi a.
Paris leh a chhehvelah lungawilo leh police-te inbeihna thlengin a bik takin tleirawl kahhlumna Naterre ah buaina a nasa zual bawk a.
Paris region-ah hian mipui lungawilo ten car te halin dawr te luhchhuaha an hal lai te tihlanin a awm a. Paris chhim lama Fresnes lung in pawh firework hmanga beihin a awm bawk.
News agency te chuan tleirawl 20 rual vel te chuan lung in luhna chu firework leh projectile hmangin an bei tiin an sawi a. Tharum thawhna hi Pablo-Picasso district-ah nasa berin tleirawl rualte chuan ni tlak hnuah chet an la zui thin a ni.
Lille khawpuiah pawh mipui lungawi lo pungkhawmte chuan Mons-en-Baroeul town hall luhchhuahin an suasam zui bawk a. Rennes khawpuiah pawh tleirawl mi 300 vel pungkhawmin heng mi te hi police te chuan an hnawt tiau thung a.
French President Emmanuel Macron chuan tleirawl Nahel kahhlum a ni chu ngaihdam theih loh tia sawiin mahse president Macron thusawi hian police union te a ti lawm lo leh hle thung a, Macron chu officer te demna thu chhakchhuak hma lutukah an puh a ni.
Alliance Police union te chuan thiam chantirna tak tak a awm hma chuan thiamlohna a la awm lo tiin an sawi a, hei bakah hian Unite SGP police te pawhin politics thila inrawlhna awm chuan police te huatna a tipunlun thei zawk an ti bawk.
Interior Minister Gerald Darmanin chuan France Police group tena tleirawl thaha thiamchan tuma thuchhuah an neih chu a dem thu sawiin he an thuchhuahah hian police officer tleirawl kaphlumtu chu an fak a, chu mai bakah tleirawl nu leh pate chu an fa zirtirna pe tha lo tiin an dem thu an sawi bawk a. He thuchhuah erawh hi chu social media a tihchhuah niin delete a ni tawh zui thung.
Nehel-a nu Mounia chuan social media kaltlanga video a tihchhuahah a fapa hriatreng nana mipuite chu lungawilohna zawm turin a ngen a. “Naupang mai a la ni a, nu mamawh a la ni. Zingah min fawpa min hmangaih thu min hrilh a, min kalsan a ni,” tiin a sawi a.
“A hnu rei lo teah i fapa kahhlumin a awm tia hrilh ka ni a. Eng nge ka tih theih ang? Amah kha ka nun a ni a, ka tan engkima engkim a ni,” tiin a sawi bawk.
Nahela kaphlumtu officer chuan a nunna tana dinhmun hlauhawma a awm avanga silai hmet puak tiin a insawi thung.
Nahel hi French-Alegerian family niin kumina traffic stop kaihhnawiha France a kahhlum pahnihna a ni a, nikum khan mi 13 kahhlumin an awm thung.
Rights group te chuan kum 2017-a dan siam officer tena silai hman theihna zau zawk pekna chu an sawisel na hle a. Kum 2017 atang khan moving vehicle laka police tena silai an hmeh puah chu a pung tial tial tiin an sawi.
A tirah chuan police-te chuan tleirawl Nahela hian a car chu police te tihnat tumin an lam panin a khalh tiin an sawi a. Mahse, a hnua video tihchhuah atangin police te chuan Nahela hi a car kawngkhar darthlalang katlangin hnaih takah tlan a tum laiin an kap tih a lang thung a. Chu mai bakah video-ah hian aw fiah takin, “I lu-ah kahin a awm dawn,” tia a au lawng lawng chu hriat theihin a awm bawk.
Police tena silai an hmehpuah lai hian car chhungah midang pahnih an awm a, pakhat chu tlanchhiain pakhat chu police ten an man a, kum tling lo a ni thung.
“Tleirawl tê thah a nihnaah thiamchan theih a ni lo,” tiin President Macron chuan a sawi a, thil tisualtute chu an phu tawka hremna pek ngei an ni ang, a ti bawk.
“Tleirawl Nahela thihna hi ram pumin kan tuar a, a chhungte pawh kan tawrhpuiin ram pum min nghawng a ni. Tleirawl tê kahhlumin a awm a. Chu chu pawm theih a ni lo,” tiin a sawi bawk a. He mi chungchang hi court hnenah thlen nghal niin dan ang taka rang taka hmalak a ni ang, tiin a sawi bawk.