Khelmuala kirleh tur Swiatek

Khelmuala kirleh tur Swiatek
September thla US Open quarter-final match pakhata Jessica Pegula a hneh loh hnua chawlhhahdam ta vang vang rih world number two Iga Swiatek chuan Thawhlehni khan tennis fans tan chanchin bengverh a puang a, November thla Malaga khawpuia Billie Jean King Cup Finals-ah Poland tan a inlan dawn tih a sawi.
Poland hian opening match-ah mualneitu Spain an hmachhawn dawn a ni.
Kum 23 mi hian kuminah hah tawngkhawng a inti a, New York tournament liana semi-final a luh zawh loh hnuah chawlh a puang a, Asia khawmualpui lama WTA tour-ah hmuh tur a awm lo a, hetih chhung hian ranking lamah san belh ta lo chu tunkar tir mai khan number one position pawh Belarusian Aryna Sabalenka lakah a hloh fel ta hial a ni.
Chutiang mi chuan ram tana a khel leh thei tur a hlim thu leh Poland tan inchhuang larh chungin a khel dawn tih a sawi.
Tun thlatir lama a coach chhawr lai Tomasz Wiktorowski a ban hnuah Swiatek hian a team-ah Wim Fissette a senglut a; world ranking-a number one dinhmun luahkir leh tura a beihna kal zelah November thla hian Riyadh khawpuia hmeichhe tennis season kharna tournament WTA Finals a hmachhawn leh bawk ang.