Khua la vawt vak rih lo

Kum a tawp hnai a, thlasik rim a nam tan. Mahse khua a la vawt vak lo a, a vawt ta deuh e tih chauh a ni. Khaw vawh tak tak a la hun lo ve bawk.
Favang boruak thiang a liam a, thlasik rim a nam ve nghal. November chu a hriat ngei mai a, mahse vawt tak a la ni lo. A vawh ber lai pawhin 16°C te a la ni.
State Meteorological Centre-in an chhinchhiah danin, November-ah a vawh ber laiin ni 16-ah khan 16°C a ni a, hei aia a hniam lai a la awm lo.
Sik leh sa chhinchhiahnaah hian ni khata a vawh ber lai leh a lum ber lai an chhinchhiah thin a, a vawh ber laia a hniam vak lo a nih pawhin a lum ber laiin a sang vak lo a nih chuan, khami ni kha mihring chuan vawt a ti thei tho. November ni 16-ah pawh hian a vawh ber laiin 16°C a ni a, hei hi a hniam lo na a, a lum ber laiin 25°C a ni a, hei hi a lum loh avangin khami ni kha a vawt thei ve tho.
November ni 20-ah a vawh ber laiin 17°C a ni a, hei hi a hniam ber dawttu a ni rih. Hemi ni hian a lum ber laiin 24°C a ni a, a lum ber laia a lum vak loh avangin hemi ni hi vawt deuh surh tih theih tur chu a ni ve.
Kumin hi kum tir atangin khua a vawt lutuk lo a, a lum lutuk lo bawk. A vawh ber lai pawhin 10°C a la ni a, January ni 9-ah khan 10°C hi a kawk.
Mizoram thlasikah 10°C hi a vawt lem lo a, 5°C hnuai te, a chang phei chuan 2°C te pawh a nih chang a awm. Tun hnai kum thum chhungin thlasik a na lo a, 2024 ang bawkin 2023-ah pawh a vawh ber laiin 10°C (January ni 19) a ni. Kuminah a vawh ber laiin 10°C a la ni rih bawk. December velah 10°C aiin a hniam thei a, January phei chu kum tinin Mizoram vawh ber lai a ni thin.
A lum lamah pawh kumin hi a lum huam huam lo. Kuminah 31°C aia a lum lai a la awm lo a, 31°C hi chu a thleng zo. Kum dangah chuan 33°C chung lam te, 35°C a thlen chang te a awm.