David Zochhuanmawia
(Vida Hrahsel Saza)
-- Advertisement --
Khuarêl chhiatna tia kan sawi fo thin hi a dik bawk e. Kan duhthusam ni hauh lova chhiatna lo thleng kan sawina a ni a. Kan beisei loh leh kan rin phâk hauh loha chhiatna lo thleng thin hi a ni. Mihring hi Pathianin a duh taka a din ni mah ila a then tan duh vâng renga piang kan ni lo ang hian kan duh vang ni hauh lova kan chunga thil tha lo rawn thleng thin kan sawina hi a ni.
Aizawl leh a chhehvel chhiatna (Leimin) –
Tun hnaiah Aizawl leh a chhehvelah Cyclone Remal kan state thenawma lo thleng siper kan dawn avangin chhum lo chat lovin nasa takin ruah a sur a. Kan leilung, pialtlêp chunga lei awmchhun te’n inchelhbehna tûr nei lovin hmun hrang hrangah inang lo tak takin a mual tawlhin lei a tawlh a. A then erawh leilung ngheh loh avanga leimin pangngai a ni hlawm a. A ti nghet lotu chu leivung la sakhat lo leh tuiin a chiah hneh êm avanga ro thei lo, lei hnip te hi an ni.
Heti ang hun a lo thlen hian a tuârtu chhungkua an awm thin a. An lainatawmin an khawngaihthlak tak zet a ni. Hmun hrang hranga chhiatna thlenga thihna kut vâwtin a man chhungkuate ka tawrhpui a, ruâng tak ngial pawh an hmuh zawh tâk loh chhungkuate phei chu an lainatawm lehzual hlê mai. Kuta sak loh van nuamah hlim te’n lêng se, van angelte’n an thlâ mawi tak khâwngin van kawtchhuahah lo hmuak theuh rawh se. Hlim taka intawk khawm leh tûrin leia awmte inbuatsaih zel zawk ang u.
Kan siamchawp pawi thûi tak –
Mizo Kristian-te hi hmanlâi kan pi leh pute atanga ngaihsam tak, a hnu kum tam tak lo awm tûr ngaihtuah lem lo kan ni tlângpui a. Kan tana awlsam tûr anih phawt chuan thenawmte pawhin tuâr dawn mah se an chhiatna leh an tawrhna tûr ngaihtuah pha lêm lo kan ni tlangpui a, sual vang êm êm lam a ni lo. thenkhat erawh sual vang hrim hrima thenawm te, kawmthlang te pawhin tuâr dawn mah se keimah ka him a, ka nawmsak chuan a tawk, ti niawm taka In sa pawh an awm ve bawk a. Midang tana pawi tûr ngaihtuah lawk pha leh pha lo hi kan awm teuh âwm e.
May, 2024 thla tawp lama chhiatna nasa tak lo thleng kha hmân atanga mahni in bul theuha tui luan kawr (Side-drain) tha taka kan siam loh rah a ni thei a. Kum 10 hmalam atanga tuichhe paihna kawng mumal lo hi lei hnuaiah a lût a, lei a lo inchiah hnip zel a, a hnu fê, a pawi ang tih kan rin phak loh hnu hian a rawn inmûng a, kan duh loh thil pawi tak kan tawngbaw palh ni pawhin a lang a, a pawi tak zet a ni.
Keini aia mithiam zawk te’n ziah tûr an ngahin ka ring a. Mahse, rilrua ka veina a rei tawh a, he chhiatna lo thlen hma daih hian Dulte lam unau/thian tha te hnenah chuan zirtirna (Awareness) te pawh ka lo nei ve hial tawh a. “A ni dawn teh tak e, Cement-a zût ngei tui luan kawr tha deuh siam a ngai a nih chu,” an ti a, a then chuan an siam tha nghal bawk a. Hetah hian ka sawi uar leh an pawm tak chu tun atanga kum 10 (Decade) kan thlir a ngai tih hi a ni. Tui luan kawr tha kan neih loh avangin tuna miten kan tuar nghal mai lo a ni thei, mahse nakinah keini lovin an tawrh theih mangkhawng lian tak kan chhêk palh thei a ni.
Tin, motor kawngpui bung tih te, Kawngpui tla bal kan tih zawng zawngte pawh hi kawng sira tui luan kawr (Drain) that tawk loh vang a ni chiang a. Lei ruh tha tak, hman a ta mihring, sakawr leh motor kawngpuia hman tawh a bung leh a tla bal hi hriatthiam a har lek lek thin. Kawngpui siamtuten kawng sira tui luan tir dan leh tui luan kawr tha hi kawng pui mâm tha neih nen a pawimawh dân a inang reng tih hre nawn leh se a duhawm ngawt mai. MPWD leh Contractor-te pawhin he thil hi uluk taka kan ngaihtuah a ngai ta niin a lang a. Kan hnam chauh ni lo, kan ram hi a him tel a ngai a, chuta tân chuan mawhphurhna kan nei vek a ni.
A tlipna –
A tawpa ka’n sawi duh pawimawh deuh chu, “Nangmah i inhmangaih angin, i vêngte pawh i hmangaih tûr a ni,” tih hi a ni a. Kan thenawm te, kan kawmthlang te, kan kawmchhak te, kan bul hnaia chêngte tana hnawksak khawpa in sak te, hnathawh te, tul lo taka bengchhen te, keimahni chhungkaw bil thil avanga khawtlangin kawng chhia a neih phah nachhan te, thil tam tak a awm ang. He’ng zawng zawng hi pumpelh theih a ni a. Pumpelh tûr chuan mawhphurna kan nei vek a. Chu mawhphurhna chu kan kovah theuh a awm a ni tih kan hriat nawn leh a ngai a ni.
Leimin laka kan him theihna atan thing leh mau phun uâr a ngai a. Thingkung zung tam takin lei a phuar khawm nghet a, tin tuihnâ tha tak a siam chhuak a, chu chu a luanna tûr dik taka a luan chuan kan leilung tana thil chenfâkawm tak a ni zel dawn a ni. Tin, mahni inbul theuha tui luan kawr (side-drain) that leh that loh enfiah ila, a nei tha lovin siam tha ila, kan tui paih danah tun atanga kan fimkhur chuan kan hun lo kal zel tûrah kan tu leh fâte chhiatna tûr tam tak kan hum sak thei dawn bawk a ni.
“Ram leh Hnam chhan tûrin nang leh kei kan pawimawh a, bul tantu hmasa nih a pawimawhzia i hre thar leh ang u.”