Khuarel mawina (Natural Beauty)

Tunhnai kum 5 chhunga Mizoram rawn tlawhtu khualzin chu mi nuai ruk chuang (6,24,628) an tling tih tourism minister chuan session hnuhnung berah khan a sawi a. Hei hi chawhrualin kum tin khualzin 1,24,925 nei ziah ang kan ni a. Kum 2022-2023-ah phei chuan khualzin 2,20,008 an awm a. Tourism minister-in a sawi dan chuan, hun kal tawhah hetiang zat hian kum khat chhungin Mizoram an la tlawh ngai lo.
Khualzin a kum tela an pung chho ta hi a lawmawm hle a, Mizoram tourism department hmalakna rah tiin a sawi theih mai awm e.
Mizorama khualzin lo luh dan hi chawhrualin ni tin 347 ang a ni a, kum 2022-23 bikah phei chuan chawhrualin ni tin khualzin 611 an lo lut tihna a ni. Lengpui airport paltlanga lo lut vek ni ta se, thlawhtheihna passenger 150 phur thei chiin khualzin trip 4 ni tin a rawn phur lut ziah, tihna a ni awm e.
Tourism minister-in a sawi dan chuan, ram pawn lam khualzin leh ramchhung atanga khualzin lokalte leh an rawn zin chhante, a hrangin record vek a ni. Hetianga record fel taka vawn that (maintain & manage) a nih chuan, tourism promote-na kawngah engtia hmalak zui zel chi nge ni ang tih pawh a hriat theih ruak thin dawn tihna a ni a; chu chuan tourism hmasawnna a tihchak phah sauh sauh ang tih a rinawm bawk.
Mizoram hian tourism industry tihlen theihna (potential) tha tak a nei, tih hi tunhmaa ram hruaitute pawhin assembly house-a an lo auchhuahpui thin a ni a, mahse khualzin hip lut tam tura hmalakna a chaurau thin hle a, ‘tourist lodge’ sak tlut tlut bak hmalakna dang hmuh tur a awm ngai vak lo. Sawrkar laipuiin festival hmanga khualzin hip luhna tur lam hawi buatsaih tura state tin a tih dungzuiin anthurium festival te, winter festival, thalfavang kut etc. kan han ti ve lauh lauh a, mahse tualchhung intihhlimna chikhat ang lekin kan chhuah.
Khualzinte duhzawng chu siam chawp ni lovin, Khuarel mawina (natural beauty) a ni a, kan zo tlang ram nuam hring dup leh boruak thiang nuam tak hi kan humhalh that poh leh, chu chuan sum a thawk chhuak mai dawn a lo ni. ‘Man made beauty’ ni lovin, ‘natural beauty’ hi kan humhalh tlat a, kan chawi vul thiam phawt chuan ‘sum tha hmu’ kan ni mai.