Khumah rulin a chuk Fimkhur turin inchah

August 20 khan Serchhip district Buangpui khuaah tleirawl pakhat chu an ina lut rulin a khumah a chuk a, tunah hian ICU-ah dah niin damdawi inah enkawl mek a ni. Fur laiin rul an vakchhuak nasa a, fimkhur a tul tih sawi a ni.
Thudawn danin, Lallianzami (17) d/o HT Rokunga, Buangpui chu Thawhlehni zing dar 5-6 inkar vel khan a mut laiin an ina lut rulin a chuk nia hriat a ni a, a unaupa in rul hi rizai kara a awm chu hmu in a that. A tirah harsatna lian tak a thlen loa, a chukna lai, a khel bawr chu a bawk lel a, a hnungzang chho erawh na a ti. Thenzawl damdawi inah an kalpui a, damdawi an pek hnu ah an hawpui leh a ni.
A thawk a hnawh deuh avangin Thenzawl damdawi inah bawk an kalpui leh a, rul leh a kaihhnawih chungchang hre thuk deuhte an biakrawnnaah Aizawla enkawl tura kalpui thuai an rawtpui a, hemi ang hian Thawhlehni chawhnu hian Aizawl panpui a ni.
An kal dawn lai thleng hian a la harh tha viau a, tlai dar 5 vela Aizawl thlenpui a nih chuan a chau tawh hle nia sawi niin, Greenwood Hospital panpui a ni a, doctor-ten lo enkawl nghalin ICU-a dahluh a ni.
A chuktu rul hi Khuavang rul (Black krait) nia hriat a ni a, inchi 13 vel chauh a ni. Hemi hma ni 4-5 kalta vel khan an in bulah hian rul a lo awm ringawt tawh bawk a, rulin Lallianzami a chuk ni hian an khaw mi mipa pakhat chu rulin a chuk ve bawk.
Rul chanchin hre thukte sawi danin, fur laiin Khuavangrul (Black krait) hi zanah an vak chhuak nasa a. In chhungah pawh an lut fo thin. Khuavang rul hi Mizorama rul chuk vanga thihna thlen tam ber zing ami niin, a chuk hi a na vak loa, a chuk atanga minute 15 vel thleng chu engtin vak mah an awm lo. Minute 30 hnu vel atangin a tur (venom) a thawk chauh a. A chuk hlima anti-venom lak nghal loh chuan thihpui hlauhawm tak a ni tih sawi a ni. Zana khawlai veivahna leh inchhung vel enfiah thin a tha hle tih an sawi a ni.