Kia Syros SUV-in Aizawl a lo thleng ta

On Feb 10, 2025 26 0

Kia Syros SUV-in Aizawl a lo thleng ta
LBS Kia Motors chuan Inrinni kalta kan Ajal Club Park, Aizawl-ah Kia Syros khuhhawnna an nei a, Kia kutchhuak zingah a pianhmang leh ruangam a danglam deuh a, a feature leh technology te a zawlpui hoah chuan a changtlung ber pawla chhal ngam niin, hralh kal viau tura beisei a ni.
Aizawl-a Kis Syros khuhhawnna hi Mizoram Lokayukta deputy secratary Lalmalsawma Hnamte leh LBS Group board member Joseph Lalthanpuia’n neiin, an car dang nena khaikhinin a pianghmang a danglam bik a, Kia-in Carnival electric car a siam chhuah zulzuiin a ruangam duan a ni. Lalmalsawma chuan Mizote duh tur leh fuh tak a nih a beisei thu a sawi a, LBS Kia vehicle incharge Vanlalfakawma chuan India ram SUV khawvela bung thar kaipuitu tur a nih thu leh a design, feature leh technology bakah a safety lamah pawh changkang taka thuam a nih thu a sawi.
Kia India chuan an Syros subcompact SUV chu India-ah an tlangzarh a, chi ruk- HTK, HTK (O), HTK+, HTX, HTX+ leh HTX+(O) a awm a, a model a zirin Rs 9,00,000 atanga Rs 17,00,000 man thlengin a awm. Syros hi Kia kutchhuak subcompact SUV India-a an tlangzarh pahnihna a ni.
A Kia Syros hian a hmalamah air dam lian tha tak neiin, a laiah a inthen a, flat roofline leh glasshouse sang tha tak a nei bawk. A wheel arches-ah cladding dangdai deuh tak a nei a, a hnung lamah tail lamp design danglam deuh hlek, L-shaped design a nei a, faux skid plate a nei bawk.
A model sang deuhah chuan Level 2 advanced driver assistance system (ADAS), rear seat tawlh thei leh awn thei, ventilation function nei, panoramic sunroof, 64-colour ambient lighting, powered driver seat, ventilated front seat, 360-degree camera, wireless smartphone charging, drive leh traction mode chi hrang hrang bakah air purifier a nei a, a model zawng zawngah airbag paruk, ABS, traction control, stability control, tyre pressure monoitor, hill start assist leh front & rear parking sensor a nei bawk.
A mechanical-ah chuan Syros hi engine chi hnih-ah duhthlan tur a awm a, 1.0-litre T-GDI turbo-petrol le 1.5-litre CRDi turbo diesel engine awmin, turbo-petrol i 6-speed manual leh 7-speed dual-clutch automatic-ah duhthlan tur awmin, diesel hi 6-speed manual leh 6-speed torque converter automatic-ah duhthlan tur a awm bawk.
September 2022 khan LBS Kia showroom hawn a ni a, Kia car chi thum Sonet, Seltos leh Carens zuarin a vaiin 600 vel an hralh chhuak tawh niin an sawi.