Dating tips

Dating tips
Zei hi a har a, midang tihpui tur chuan kan zei viau pawh a ni thei a, mahni tan erawh a sak ve deuh tlat thin. “Chutiang chuan awm ta che,” tia thiante thurawn kan pek te pawh kan chunga a lo tlak ve chuan kan hamhaih ve leh tho thin. Inrim tumkhatna emaw in-date vawikhatna emawah hian chet dan tur hriatthiam a har a, kan lai a, kan khawr deuh riau thin.
Tun tumah hian relationship lama mithiam leh matchmaker Caroline Brealey dating tip-te kan rawn tarlang e.
1. Inrim emaw in-date emaw hmain i date tur chu a chanchin te lo ngaihven zau deuh la, a nuam tihzawng leh a duh zawng te lo hre lawk thei la, chu chuan a pui viau ang che.
2. I phur viau ang a, mahse, i phurna chu in kaihhruai tir lutuk suh. Beisei s^ng tak nei lo la, chuti lo chu i beisei ang a nih lohin i hnual lutuk palh ang.
3. I huphurh ru viau a ni thei a, eng emaw mawlhtu awm ang maia awm hle hle theih loh te pawh i nei phah mai thei, i huphurh luat vanga a dawn tepa thulh leh thut te pawh i chak rum rum mai thei, mahse, i thulh leh thut a nih chuan i date tur nena in inkarin a tuar ngei ang.
4. In-date vawikhatna emaw inrim vawikhatna emawah chuan sawi tur a vang duh riau thin a, chutiang hun atan chuan eng emaw lo khawl ru ve rawh. Fiamthu thianghlim pahnih khat te chu pai ve ran ang che. In pahniha in nuih dun thei chuan boruak a zang deuh hawk ang a, chu chuan kawngro a su thui viau ang.
5. In-date vawikhatnaah engkim fel nghal duak turin beisei lo la, a fel nghal a nih chuan a lawmawm a ni mai. In pahniha inhriat tanna tura bul tanna chauh a nih avangin beisei san nghal viau loh tur a ni. In lo in mil viau a nih chuan in inkawp zui thei a, in inmil vak lo a nih pawhin in thlauh leh mai tur a ni. Chutiang atana bul tannaah ngai ang che.
6. Vawikhat in-date-na hi a pawimawh hle a, incheina pawh ngaihpawimawh tur a ni. In in-date-na hmun a zirin incheina thlang thiam la, nangmah i confi theihna ang chiin inthuam ang che. |awp deuh emaw, ti deuh khep khup emawa inchei a fuh lo ve ve. I taksa lang thei laiah hmuh nuam lo tur a awm em tih te uluk takin endik la, i haah thil bet a awm em? Hnar kua te a felfai em, chutiangin kamsir leh beng te, kuttin thlengin, chutiangin i incheinaah pawh tihsual palh emaw, zipper zip theihnghilh emaw, kawr zak tet emaw, eng emaw dik lo awm thei in-check uluk ang che.
7. In-date-na hmun tur thlan thiam hi a pawimawh hle. A vawikhatna tur a nih chuan mi rik mur murna ring tak taka inbiak ngaihna hmun emaw, hmun lûn lutuk emaw a fuh lo ang. Chutih rualin concert en dun emaw, inkhel en dun emaw te chu a tichi viau thei ve tho bawk. In pahniha midang mitmei veng a tulna leh ngaihtuahna lapeng thei awmna te chu a fuh vak lo ang. Hmun cool deuh raih ni thei se a tha hle ang.
8. Hlim hmel put i tum dawn nia, i nervous lutuk avangin nuih te kha i theihnghilh palh ang e. Nui hmel hi tûm hmel ai chuan hmuh a nuam daih zawk a nia, in-date vawikhatnaah bakah nidang zelah pawh hei hi a pawimawh hle a ni.
9. Thu hlimawm lam chauh sawi ti tum dawn nia. In hnaa inbuai thu leh thawhpui te nena inkar boruak tha lo emaw, chhungkaw harsatna leh buaina tawh chungchang te chu nakina sawiah khek zawk rawh. In-date vawikhatnaah chuan chanchin tha lo lam aiin thu hlimawm lamin boruak a keng zawk ang.
10. Nangmah chauh tawng tum bik lo la, a ngaithlatu zawkah te pawh tan tum rawh. Zawhna i zawt a nih chuan a chhanna kha uluk takin lo ngaithla ang che. I date pawh kha a zâm ru ve tho tih hria la, sawi tur a hre vak lo a nih pawhin zawhna zawt tam la, ‘aw’ leh ‘aih’ tih ringawta chhan mai loh chi deuh, chhanna ngai sei ve deuh te i zawh thiam chuan a tangkai viau ang.
11. |ek deuh chuai chuai kha beisei nghal kher suh. Chutiang chu a lo thleng a nih chuan a lawmawm, a lo thleng lo a nih pawhin ‘down’ phahna tur a ni lo. Hmangaihna leh inhip tawnna hi vawi leh khata awm nghal thut a ni lo va, muang changin a rawn thawk thin. Vawikhat in-date-naah tek deuh chhek chhek a awm loh vang maiin i kawppui awm mi a ni lo tihna a ni lo, chutiang chu a lo awm theih nan nghah ve deuh a ngai thin.
12. Eye contact a pawimawh. Mit leh mit intawn tir hian mi a phuar nghet a, chumai a ni lo, mi kan ngaihsak tih a entir bawk. I date chu a mitah tak en deuh zeuh zeuh rawh, mahse, hrehawm a tihna tur khawpa rei en vung vung erawh a fuh lo. A khat mawi tawka second 5 vel mit han intawn tir leh zeuh thin kha a tawk viau.
13. Phunchiar viau suh ang che. In in-date-na hmun sawi sel chiam te, an ei leh in siam tui i tih loh thu sawi vak vak te, leh thil dang reng rengah pawh sawiselna tur zawn loh tur a ni. Vawi khat in-date-naah i date khan phunchiar a tih che chuan in-date leh a sak talh palh ang e.