KMMMTTP-in Mizoram a ngawng theih dan tur sawrkarin a zirchiang
KMMMTTP-in Mizoram a ngawng
theih dan tur sawrkarin a zirchiang
Mizoram sawrkar chuan Kaladan Multi- Modal Transit Transport Project (KMMTTP) in Mizoram leh Mizote a chhe zawng emaw a tha zawng emawa a nghawng theih dan tur zirchiangtu tur Committee a din a, an ni hian an zirchiang tan mek.
Inrinni khan KMMTTP Impact of the Study Group Committee hi an chairman T Lalhlimpuia MLA hoa thawkchhuakin Myanmar leh India inrina Zochachhuah leh Hmawngbuchhuah khua bakah a chhehvel khua an tlawh a. Lawngtlai East Bialtu MLA Dr Lorrain Lalpekliana Chinzah leh Lunglei Municipal Council executive councillor H Zorinsanga bakahLawngtlai PWD Division hotuten an tawiawm.
Act East Policy hnuaia KMMTTP hmalakna kalpui hi sawrkar laipui chuan Mizoram chhung atanga chhim lam, Mizoram tawp Zochachhuah thlengin kawngpui sial hna a thawk zo tawh a. Zochachhuah (Mizoram) atanga Myanmar ram chhung lam Paletwa thlenga kawngpui sial tur niin, kum 2027-ah chuan zawhfel tumin an inruahman nia hriat a ni.
He kawngpui sial leh sumdawnna kalpui tum hian a chhe zawng leh a tuartu lamah Mizoram a siam theih avangin Mizoram sawrkar chuan kawng hrang hranga nghawng tha lo thlen loh a, hmasawnna leh changkanna zawk kan neih theihna turin inbuatsaiha hma laktul a ti a; Study Group hian a zirchian bakah Mizoram mipui chu inbuatsaihna tha nei a, he hmasawnna lo awm tur hi a hlawk zawng leh tha zawnga chhawrtu an nih theihnan tan lakna tur hrang hrang zirtirin a kawhhmuh dawn a ni.
Zochachhuah khawtlang hruaitute sawi danin, KMMTTP avang hian Bangladesh mi dan loa lo lut an awm rih loa, Myanmar atang erawh chuan raltlan in 40 vel an khuaah an awm. KMMTTP avanga hmasawnna hi Myanmar lam chu a teltuah an tang hmasa a, mamawh hrang hrang Mizoram atangin an chawlut mek zel niin an sawi. Mizoram lam chuan Myanmar atanga chawkluh an la nei meuh lo tih an sawi a ni. Zochachhuahah hian primary school pakhat leh upper primary school pakhat awmin, kohhran pathum an awm a, voters 122 leh chenna in 162 a awm a ni.
Study Group Committee chairman leh amah tawiawmtute hian Mizoram chhim tawp thlenga rel kawng sial tumna, Hmawngbuchhuah khua pawh an tlawh a. India ram chin Zochachhuah atanga Myanmar ramchhung Paletwa thleng kawng sial thui zawng tur hi km.126 vel a ni a, IRCON company chuan a thawk a ni.