Knockout ram dai tawh leh hmabak la neite…

He thu buatsaih lai thleng hian FIFA World Cup 2026 group stage khelh mekah Group A, B leh C-te inchingfel tawhin, final round group fixture kal mek karah tling tawh leh inchinfel hmabak kan thlirkual dawn a ni.
July ni 19-a World Cup final thlen tuma intihsiakna kal mekah team chhuak 48 atangin 32-ah an inthlifim phawt dawn kha a ni a; tie-breaker rule thar hman niin, group atanga pahnihna luah pha loa automatic-a knock out ram thleng zo lo pathumna team zing atang pawhin round of 32 luhna kawng a kaw dawn a nih kha.
tun dinhmunah England chu Group L hmahruaitu ni mekin, Group C lama pathumna luahtu Scotland nen last 16-a insu thei dinhmunah an la ding chhunzawm che che a, mahse, Scot-ho hi nimin zing khan Brazil lakah si thum faiin an tlawm tlat mai a, best third-placed team pakhat ni chunga last-32 luh an beiseina a chau hle tawh.
Group stage hi an han khel zo ang a, group 12-a thensawm hnua group tina a sang pahnih zelin last 32 an lut dawn a, pathumna team zinga record nei tha zual team pariat inhlangkai ve lehin, a pumpuia team inlan 48 atangin ram 16 chuan an puanthuah telin tournament an mangtha a ngai tawh dawn a, a la bang ram 32-in trophy an inchuh chhunzawm ang.
third-placed team zinga knock out ram kai tur zawnnaah hian ram pahnih emaw a aia tam pawh point inang an awm palh chuan an dinhmun tichiang tura tie-breaker hmasaberah head-to-head result en a ni ang.
Chu mi hmanga tihfel theih a la nih loh chuan goal difference leh goal thun zat tihte bakah team nungchang (Fifa’s team Conduct Score) – red leh yellow card hmuh dan hmangin an buk leh ang a, tah pawh chuan lo la intiat leh zel ta se a tawpkhawka tehfung an khai tur chu tun, June thla Fifa ranking-a an dinhmun atangin tlang tur an tichiang tawh dawn a ni.
He’ng tehfung (criteria)-te hi team pali zel awmna group 12 china third placed tem 12-te ranking siamna atana hman tur chauh a ni.
Group hrang hrang dinhmun lam hawi tawh ila.
Group A
A thlengtu pakhat Mexico chu match thuma chak vek chungin 100% record nen knockout stage lut hmasa ber ram an ni.
El tri hian karleh thawhlehni khian last 32 an khel dawn a, chu ta an tum tur ram chu la chiang lo mah se Group C, E, F, H or I atanga third-placed team an ni dawn a, an khawng lutuk thei dawn lo!
Nimin zingah South Africa chuan an group stage game hnuhnung berah si khat faia South Korea hnehin pahnihna an luah nghet a, an ram chanchina a vawi khatna atan knockout stage lutin, karleh thawhtanni khian last 32 lamah a thlengtu pakhat Canada nen Los Angeles khuaah an intum ang.
African team laka an tlawm avangin point thum nen South Korea chuan pathumna an luah a, group dang result-ah knock out kai leh kai loh a innghat tawh dawn.
Ningani vek khan Czech Republic chu a thlengtu ram pakhat Mexico lakah si khat faiin an tlawm leh a, match thuma point khat chauh nen table mawngphah luah chungin an tla fel.
Group B
Anni group pawh hi group stage khel zo tawh niin, nimin zinga Canada laka 2-1 hnehna chang Switzerland chuan point sarih hum chungin group champion nihna an sual chhuak.
Swiss-ho hian last-32 tie-ah team nem zawk tura ngaih third-placed team zinga pakhat an tum dawn a ni.
Point li kawltu Canada chuan goal difference hmanga point li ve bawk khawl tling Bosnia-Herzegovina hmakhalh hramin runners-up nihna an chang a, knock out stage hmasa berah South Africa an tum dawn.
Bosnia-Herzegovina hian an group match hnuhnung berah 3-1-in Ningani khan Qatar an hneh a; best third-placed team zinga tel thei turin dinhmun tha takah an ding mek.
Group C
Vawi nga champion thei awmchhun Brazil hian nimin zing vartianah si thum faia Scotland sawpin chungin anmahni ang bawka point sarih nei ve Morocco lakah goal difference hmanga an chungnun zawk avangin group champion an ni hram a, last 32-ah Group F runners-up an hmachhawn ang.
Morocco pawhin nimin inkhel dangah 4-2 laia Haiti hnehin knock out round an lut a, North African-ho tum leh tur hi Group F champion an nih a ngai ul tawh dawn!
Point thum nena pathumna luahtu Scotland tana last 32 luh theihna chance la awm hi football statistics lam buaipuitu Opta chhut danin 38% a ni a, Steve Clarke-a naute dinhmun hi a derthawng angreng!
Point khat bak hlawhchhuak zo lo Haiti tan chuan haw hmaa bazar sawk sawk a ni tawh mai!
Group D
Khelh hniha vawi hnih chak tawh United States hian khelh khat hmabak la nei chung leh Group D winner ni chungin knockout stage an lut fel tawh a, next round-ah Groups B, E, F, I or J atanga third-placed team khawi emaw ber an su dawn.
Australia leh Paraguay chuan point thum ve ve nei tawhin, goal difference hmanga chungnung zawk Socceroos tan tlang chho ve turin an group game khat la neihah ‘draw’ a tawk pha tawh.
Pahnihna luah chunga tlang chho tur chuan Paraguay tan Australia hneh ngei ngei a ngai thung dawn a, an tlang chuan Group G runners-up an tum ang.
Draw a nih pawhin point li nen Paraguay tan pathumna tha zual chin kaltlanga last 32 luhna kawng a kaw duai dawn tho a, inhnehtawk tur tawk vela hahdama khelh thei dinhmuna an ding a nih pawhin ‘good idea’ a tih theih tho ang chu!
Australia leh Paraguay hi tlawm ve ve ta se point thum hum chunga knock out stage luhna kawng la awmchhun nghah chu confi a har duh deuh dawn a ni!
Kum 2002 semi-finalist turkey tan erawh Australia leh Paraguay laka an tlawm tawh avangin an match hnuhnung berah point thum thawkchhuak ve pawh ni se beisei tur a awm tawh lo.
Group E
Vawi hnih chak tawh Germany-in group winner nihna chang chiang tawhin, Group A, B, C, D a khawi emaw ber atanga third place team an tum leh ang.
tlang chho ve turin point thum nei tawh Ivory Coast tan Curacao laka ‘draw result’ neih a tawk tawh a, an tlang chuan last-32 lamah Group L pahnihna nen an insu dawn a ni.
Ecuador tan tlang turin Germany hneh ngei ngei a ngaih tawh bakah Ivory Coast tlawm a la ngai tel cheu dawn a; point li hmu chunga pathumna an luah a nih pawhin tlang theihna kawng a zau huau dawn!
Curacao tana pahnihna luah chho thei tur chuan chak an mamawh bakah Ecuador an tlawm emaw draw emaw a ngai tawh ang.
Ecuador (-1) leh Curacao (-6) hi chak ve ve ta se Ivory Coast chan chu a mawngphah a ni dawn a, goal difference hmangin South American team zawk tan last 32 kawng a inhawng ang a, Curacao pawh best third place tehna kaltlangin an tlang ve nghal dawn a ni.
Group F
tukin zing result tarlan hman loha tla chiang tawh tunisia an hmachhawn hma hauh pawhin point li nei tawh Netherlands tan top two a chiang tawh.
Point li bawk hum tawh Japan tan pawh automatic-a tlang turin Sweden laka point khat tal an hmuh a nghai dawn a, an chak lo a nih pawhin pathumna chu an luah nghet hrim hrim dawn.
Netherlands leh Japan hi chak ve ve ta se goal difference hmanga group champion zawn a ngai dawn a; vawi hnih khelah +4 ve ve an neih laiin Dutch-ho hian goal khatin an nei tam.
An tlawm ve ve a nih pawhin goal difference hmang thoin pahnihna leh pathumna zawn a ni ang.
Goal difference-ah an la intiat cheu a nih chuan disciplinary record nei tha zawk zawk an tlang dawn a, he thu buatsaih lai thlengin Japan 0, Netherlands -3 niin, Netherlands tan Fifa world ranking a pawimawh zui ang.
Group winner chuan Morocco an tum dawn a; runners-up hmachhawn tur Brazil an ni thung.
Sweden tana automatic place chan theihna kawng awmchhun chu chak chauh a ni tawh a, chak se, Netherlands tlawm se group champion an ni lel thei!
Draw result nei ta se Sweden tan eight-best third place luahtu pakhat nihna chance a sang hle dawn tho a, an tlawm a nih chuan point thum hum chungin bukna chiang lo tak an nghah a ngai dawn!
Sweden leh Japan laka tlawm tawh tunisia tan erawh eng beiseina mah a awm tawh lo!
Group G
Inrinnia Iran laka tlawm an pumpelh hrim hrim chuan Egypt tan group champion a chiang dawn a, inkhel dangah Belgium-in New Zealand an hneh zawh loh chuan automatic-in an tling zui tho ang. A chhe berah pawh point li an neih tawh hmangin pathumna chu an ni chiang tawh hrim hrim a, tlang tluk tho an ni.
He group winner hian third-placed team engemaw ber an tum ang.
Egypt hneha tlang tur Iran-in draw pawh nei se inkhel danga Belgium an in draw ve bawk chuan Pharoahs tan top-two finish chu bel chhunga sa a ni tho tho dawn.Runners-up team tum tur chu Group D pahnihna.
Belgium tana top two luah turin New Zealand hneh a ngai a, Egypt-in Iran hneh se draw chauh pawhin pahnihna dinhmun an chang thei dawn a ni.
Belgium leh Iran an chak ve ve chuan top spot luah tur zawk chingfel turin tehna khai leh ngial a ngai dawn a, an indraw pawhin pahnihna zawk tur atan buk tho an ngai ang.
Lo inhnehtawk tawh an nih avangin buk ngai an nih chuan goal difference hmanga en an ni dawn a, he thu buatsaih lai thleng hian zero level ve ve an la ni.
Goal difference-ah la inang ta se disciplinary record (Belgium -7, Iran -2) nei tha zawk an dingchang dawn a, a dawt leh chu Fifa world ranking a nih tawh dawn avangin Belgium chan a tha ang.
An tlawm ve ve a nih chuan an qualify zo lo ve ve thung dawn a ni.
Point hnih nena a mawngphah luahtu New Zealand tan Belgium hneh mai a tawk zo tawh lo a, top two luah pha tur chuan Egypt laka Iran anchak zawh loh a ngai tel dawn a, eng tiata result tha pawh nei se group winner nih ngaihna a awm tawh lo thung.
New Zealand leh Iran an chak ve ve chuan point li hum chungin New Zealand-in pathumna an luah ang a, chu chu tlang tihna tluk tho a ni ang.
Group H
Naktuka Uruguay laka tlawm an pumpelh hrim hrimin Spain tan top two team pakhat zawk a nih theih tawh a; lo chak lo ta pawh ni se Cape Verde-in Saudi Arabia anhneh zawh loh chuan top two tho an luah dawn.
Uruguay lakah Spain tlawmin, Cape Verde chak pawh ni se Spain hian point li hum chungin pathumna an luah ang a, an tlang zui tho a rinawm a, last 32 lama an sut tur erawh a hraw deuh dawn tihna a ni.
Draw a nih chuan Spain tan group champion a nih theih dawn a, Cape Verde an chak ve bawk chuan goal difference en a ngai ang. Group winner tum tur chu Group J runners-up.
Spain hneha tlang tur Uruguay-in draw ta se top-two an beisei theihna kawng awmchhun chu Cape Verde-in draw an neih ve chauhin a ni tawh ang.
Cape Verde tana top two luah theihna hnuk hnai ber chu Saudi Arabia hneh niin, an draw pawhin Uruguay laka Spain an chak chuan an tlang tho ang.
Uruguay leh Cape Verde chak ve ve se top spot luah turin an intluk dawn a, draw ve ve a nih pawhin pahnihna ni turin an la intia zui zel ang. Dinhmun inanga an din chuan goal difference en a ni ang a, tun dinhmuna an level chu zero a ni.
Goal difference hman theih loh se disciplinary record (Cape Verde -3, Uruguay -2) tha zawk zawk an dingchang dawn a, a zuitu chu Uruguay chungnun zawkna Fifa world ranking a ni tawh ang.
Group champion nih hram hram hlawkna chu pahnihnain Argentina an tum dawn tlat a!
Cape Verde leh Uruguay hi an tlawm ve ve a nih chuan antan tournament a tawp fel ang.
Saudi Arabia tan pahnihna ni chunga tlang turin Cape Verde hneh ngawt a tawk zo tawh lo a, Uruguay laka Spain-in tlawm an pumpelh a ngai tel dawn a; an chak hrim hrim chuan automatic-a kai pumpelh mah se point li hmanga an tlang zui tho a beiseiawm.
Group I
Zanin dar 12:30-a group champion nih tuma inhmachhawn tur France leh Norway hi tlang tawh ve ve niin, goal difference-a sang zawk France tan draw pawh ni se goal difference a chhawr theih hmel a, Norway tan erawh chak ngei ngei a ngai thung.
Group winner tan third-placed team tum tur a ni a, runners-up chuan Group E pahnihna an su leh ang.
Point hmuh kawngah Senegal (-3) leh Iraq (-6) an la hmeichhe thi hul a, point thum hmu zawk zawk tan best third-place spot a beisei zui theih ang a, mahse, an goal difference hi a pachhiat dun ve em avangin he lam kawng atanga tlang tum pawh hi khirh fuat tura ngaih a ni tawh!
Group J
Khelh hniha chak ve ve tawh Argentina an top chiang tawh a, last 32-ah Group H runners-up an tum ang.
Point thum ve ve hum chunga Pathianni zinga inhmachhawn tur Austria leh Algeria-ah hian goal difference-a sang zawk Austria tan tlang turin draw a tawk.
Automatic-a kai chho turin Algeria tan chak ngei ngei a ngai thung. Draw a nih pawhin point li nen an tlang tho hmel a, group stage khelh zawhah a chiang ang!
Runners-up team tum tur chu Group H winner a nih avangin Group champion nih tum hram a fuh hmel!
Group K
Colombia tan top two spot chiang tawh mah se group hnehtu ni tur chuan Pathianni zingaPortugal an sut hunah tlawm pumpelh a ngai thung. Group winner hian third-placed team an tum dawn a ni.
Portugal tan group hnehtu ni turin chak a ngai a, draw a nih chuan pahnihna. tlawm palh ta hlauh pawh ni se Uzbekistan laka DR Congo an chak tho chuan Roberto Martinez-a team hi goal difference-ah goal ruk zetin an la sang thei dawn a, pahnihna a beiseiawm zui tho ang.
Pahnihna luah tura DR Congo chance neihchhun chu Uzbekistan hneha goal difference tha neih niin, an chak hrim hrim chuan pathumna pawh ni se point li nen chuan pathumna team tha zual pariat zinga tel phak a huphurhawm lutuk lo ang!
Point la artelukawn Uzbekistan tan pathumna luah turin chak hrim hrim a ngaih piahlamah top three pawh lo luah ta tehreng se goal difference hniam tak (-7) kawl chung chuan next round kai a huphurhawm lam deuh tawh mai thei.
Group L
Goal difference neih that zawk vang chauha Ghana chunga group hma hruai thei chang chang England-in Pathianni zingah Panama an tum leh dawn a; thomas tuchel-a team hian a ler luah hlen chunga next round lama third-placed team hmachhawn thei turin Crioatia laka Ghana result tiat emaw a aia tha emaw an sualchhuah a ngai dawn.
Ghana leh England hian draw ve ve an nei a nih chuan group champion ni tur chu three Lions an ni ang.
England leh Ghana-in point thum ve ve an hmuh belh chuan goal difference tehna hmanga top spot luah tur zawn hunah Ghana (+1) ai chuan goal thuma thun tam zawk England (+2) dinhmun a duhawm zawk hmel.
Goal difference-ah intluk leh se disciplinary record (England -1, Ghana -2) an en ang a, chu tah pawh an la inter tawk a nih chuan Fifa world ranking tehna kaltlangin three Lions an tlang dawn a ni.
Croatia laka chak leh draw-ah Ghana tan top-two finish a hmin ve ve dawn a; England result aia tha emaw goal difference-a chungnun zawkna tham goal an thun emaw a nih chauhin African-ho tan group champion nihna a inhawng ang a, an chak loh pawhin point li an hum tawh hmangin pathumna a chiang tawh tho a, knock out round lut tura an dinhmun a tha zui zel ang.
Automatic qualification chang tur Croatia tan Ghana hneh ngei a ngai tawh a; chak se, England-in point hloh then se group champion an ni chho lel thei!
Draw a nih pawhin pathumna chu la hmin tho tura ngaih a ni a, chiang fahrana an tlawm a nih erawh chuan an chance neih hi a derthawng ve thei tho.
Panama tan erawh tournament a tawp fel tawh.