Kima Mivam
-- Advertisement --
Retreat kan ti tak naa chu Kohhran Upa conference ang pawhin a sawi theih ang chu. Rawngbawltute hi tumah famkim bik awm lo intuaithar ngai vek kan ni a, chuti ang a nih laia a bika fuih thar ngai, mahse infuihtharna pui tham tak nei ngai lo chu kohhran hnarkaitu ber Kohhran Upate hi an ni thei mai ang em?
Pastor hian mihring famkim kan nih lohzia leh infuih thar ngai kan nihzia hriain, tun hma daih tawh khan Pastor retreat hi an lo hmang tawh thin a. Presbyterian kohhran chuan kum khat danah intuaitharna an nei ziaha, hlawk thlak an ti a ni ang, tun thleng pawhin an la chhunzawm a. Baptist kohhran hian intuaitharna ti chiah lo mah se, Mizoram Baptist Pastors Conference an hmang thin bawk.
Tin, sum hlawh/dawng thin tho Synod revival Speaker-te pawh intuaitharna hun siam sak an ni thin a, Speaker mai bakah an thuihhruaite (counsellors) pawh an intuaitharnaah an tel thin, a hlawkthlak thin hle a ni ang, chhimtu pawh an thahnem thei hle a ni.
Kohhran Upate hi a hranpaa Pathian thu zir ni mah suh se, inpekna avanga rawngbawltu an nihna hian nasa takin a khalh kal a, mi inzirmi phei chu Pathian thu zirte ang maiin Pathian thu thiam tak tak pawh an tam hle a ni.
Chuti ang a nih rual chuan, inpekna a lo tlakhniam deuh hnu hian Kohhran upa tam tak chuan Pathian thu zir leh chik lam aiin khawtlanga mi challang leh hotu deuh nihna anga ngaia, kohhran tana thahnem ngai hman ta vak lo leh thahnem ngai ta lo hrim hrim te pawh an kat nuk awm e. A tam zawk hi Pastor aiin an hah zawk mah a, a chhan chu mahni hna an thawh kar lakah khawtlang leh Kohhran tan an hun tam tak an seng ral thin a ni. Chhun lamah pastor tam zawkte an mut mai mai theih laiin, Kohhran Upate chuan anmahni pumpui lam hnawh khah ve nan mimal hna an thawk hah em em a, zanah leh zingah, tlaiah te pawh hah sawi hleithei lovin, Upa bial fan, mitthi ral, damlo tlawh, Komiti leh thil dang tam tak an kawp tel a ni. Chuvangin an hnathawh leh inpekna hi Pastor ai mahin a nasa zawkin a hahthlak zawk a ni. Mahse, lawmman (dearness allowance emaw) an phut ve ngai lova, khawvel thila hlawkna an beisei ve ngai hek lo tih theih a ni ang. An hun awlah chutiang rawngbawl hna chu thawk ni se chuan an chhuanawmna vak a awm bik lo maithei, mahse, an mimal leh chhungkaw tihtur pawimawh tlansan a ngaih chang a tam zawk ngei mai.
In veng/khuaa Kohhran upa fel tak kha a nitin hun hman dan han chhut sak chhin teh, a namai lo hle a nia, pastor hna zawng zawng deuh thawah hian Kohhran Upate an chet ve zel a ngai si a, a chang chuan Pastor tello pawha Kohhran thiltih pawimawh an kalpui lawp lawp a ngaih chang a tam a ni.
Chutianga hah taka thawkrim thin Kohhran Upate tana intuaitharna emaw, Khawmpui emaw te a awm ve lo hi chu Kohhran hian a ngaihtuah chian loh vang a ni thei ang em? A mamawh ber ni zawk awm tak; hah taka an hna thawh fak sak te, infuihthar an ngaih nasat laia infuihtharna hun siam sakte hi a tul tak zet a ni lo maw? Intawhkhawmna lian tham Kohhran Upa conference te hi awm thei se, Kohhran hrang hranga Upaten an harsatna han inhrilhtawn thei se, an hah tam tak a chhawk huai huai anga, Kohhran pawh hi a chak thar zawk lo’ng maw? Eng nge i ngaihdan ni ve le?