Hnehna nena bul tan Argentina

Hnehna nena bul tan Argentina
Copa America 2024 bultanna inkhelah nimin zing khan champion lai Argentina chuan sihnih faiin Canada an hneh a, Georgia state khawpui Atlanta-a Mercedes-Benz Stadium inkhela goal hnih lutte hi forward pahnih Julian Alvarez leh substitute Lautaro Martinez-te thun a ni.
Group A inkhelah hian first half chhungin South American giants hian goal an khung zo bik lo a, an thiampuipa Lionel Messi meuh pawhin north American team lakah goal a chhuaihhawng zo mai bik lo!
Chawlhlawk hma hian Canada lamin goal thun theihna hun remchang an nei ve nial a; chutih laiin Argentina lamin golden chance han tih tur an nei thung a, mahse, thui tak a khalh tlang hnuah Angel di Maria chuan a hun tha neih a bawhpelh hlauh.
Second half tan atanga minute li an khelh tlin rualin Lionel Scaloni team hian goal an nghakchhuak ta nge nge a, Inter Miami star Messi chuan Liverpool midfielder Alexis Mac Allister tan ball pe pheiin, ani hian Canada goalkeeper Maxime Crepeau lo tlanchhuak khumin Manchester City forward Alvarez-a goal tur a chhawpsak.
Si an phurh hnuah Canada lamin na angreng takin an nawrlet a, mahse, veteran centre-back Nicolas Otamendi tlanlut chuan Argentina tlarhnung a tikhawng zual a; minute 88-ah champion lai bawkin an goal hnihna an sualchhuak leh a, tuntum pawh captain Messi siamsak leh bawk atanga lut niin, Serie A club Inter Milan captain Martinez chuan nuamsaa reigning champion chakna goal a tilut.
Argentina hian Copa America title an kawl lai humhim tura an chetchhuah vawikhatnaah goal khung chiam lo mah se harsatna lian tawk loin hnehna an chang a; an goal hnihna thawhtu kum 24 mi Alvarez tan tun kha he competition bika goal a tihluh vawikhatna niin, Qatar ram 2022 FIFA World Cup semi-final match-a Croatia laka goal hnih a khung hnua La Albiceleste tana goal a thun leh vawikhatna a ni nghal bawk.
MLS superstar Messi khan Atlanta mipui 70,564 pungkhawm hmaah a ma pualin goal khung ve ta chiah lo mah se a hipkhawm mipuite a tibeidawng lo a, Canadian goalkeeper Crepeau kha an tumpui captain goal tur ven kawngah a chetha ve pah bawk a ni.
Tin, chubakah Canada defender Derek Cornelius khan an keeper tihngaihna hriat tawh loh an lama lut tur a dang a, kha khan Argentina goal tur a tikiam pah bawk.
Goal khung lo mah se record thar siam thulh thei lo Argentina captain khan history phek thar a ziak zui leh ta tho a, Copa America tournament vawisarih a luhchilh takah game 35 khel tling chiahin, kum 1953 atanga khel tana Copa match khel hnem ber ni reng thin Chilean goalkeeper Sergio Livingstone-a record a khum ta a ni.
He tournament-a Messi inlan tantirh lai chuan kum 20 mi lek la niin, champion lo zawngin a khawsa rei a, runner up vawithum a nih hnu leh kum 2019-a pathumna a nihpui hnuah kum 2021 khan a vawikhatna atan Copa America title a hlawhchhuak ve ta nge nge a, a hnuah world champion a ni zui leh ta a ni. A hmain Olympic football champion medal a lo awrh tawh bawk.
June ni 25 hian 2016 final-a an ngam loh Chile nen MetLife Stadium-ah an intum leh ang.

-- Advertisement --

Starting lineups:

Argentina XI (4-3-3): 23. E. Martinez (GK) – 26. Molina, 13. Romero, 25. Li. Martinez, 8. Acuna – 7. De Paul, 5. Paredes, 20. Mac Allister – 10. Messi, 9. Alvarez, 11. Di Maria.

Argentina Statistics Canada

19 Shots 10
9 Shots on target 2
2.87 Expected goals 1.17
9 (7) Big chances (missed) 2 (2)
65% Possession 35%
549 Passes 267
7 Corners 4
15 Fouls 9
2 Yellow cards 2

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More