Kolasib-ah bawlhhlawh then runpui

District Urban Development Office Kolasib, Joint Village Council leh Sub Hqrs. YMA Kolasib tangho buatsaihin ‘Project Waste Free Kolasib 2024’ thawhhnihna atan Thawhtanni khan Kolasib khawchhunga veng hrang hrangah bawlhhlawh thenfai hnatlang pui neih a ni a. Venglai, College Veng leh Project Veng atangin hnatlang an chhuak a, district bawrhsap John LT Sanga’n a vailiam.
Kan nitin nunphungah bawlhhlawh siam tlem zawnga khawsak thiam a tul tih bawrhsap hian a sawi a. Kan tlan tui hnarte humhalh leh enkawl thianghlim a tul tih a sawi bawk.
DUDO Gilbert Lalhlimpuia chuan tehfung hrang hrang hmanga khawpui fai inelnaah Kolasib chu a hnufual pawl a ni thin a, kumin October-a Cleaniness Week chhunga endik turah faina kawnga hmasawnna a awm theih nan hma lak zel tum a ni tih a sawi.
Faina hnatlang puiah hian Kolasib town huamchhunga village council hrang hrangten khawtlang hnatlang koin anmahni huam chin theuhah hma an la a. Kawng kam leh tuihawk luankawr an thianfai.
Project Waste Free Kolasib 2024 hnuaiah hian DUDO leh CZS Higher Secondary School Kolasib tangdun chuan Tuichhuahen lui hnara bawlhhlawh thianfaiin an lo hnatlang tawh a ni.