KTP inkhawmah ruihhlo that loh zia inhrilh thar

KTP General Conference vawi 61-na Saituala neih zawh taka thu pass pakhat, “Central KTP-in ruihhlo do kawngah chak takin hma la rawh se” tih bawhzuiin KTP Ramrikawn Branch chuan an member leh tleirawl kokhawmin, ruihhlo do lama hma latu pawl Foundation For Drug-Free Mizoram nen ruihhlo that loh zia zirhona KTP Inkhawm – Thawhtanni zan khan an buatsaih.
Resource person Dr Zorinsangi chuan medical science zirna atanga ruihhloin mihring thluak leh hriselna a thunun theih dan leh chumi in nghawng tha lo a neih dan a sawifiah a. Kan nih tur ang min nih tir thei lotu leh hmuhsitawma min siamtu ruihhlo laka fihlim turin inkhawmte a fuih.
He pawl dintu Lalnunthara chuan, tunhma chuan kohhran leh khawtlanga inhmang chu mifel tehfung ber a nih thin laiin, vawiina thalaite nun danah chuan chu tehfung zahawm tak chu an la vawnghim em, tih inzawh a ngai ta tih a sawi a. “Mizoram chu ruihhloin nasa takin min run a, ruihhlo do campaign hi tleirawl zingah chauh a tawk zo tawh lo. Miin mi puitlinga an ngaih chinah pawh damdawi hmansual hi sawi tur a awm a. Khawtlanga inhmang thenkhat pawh ruihhlo kaihhnawiha man hial tawk leh kohhranmite zingah ruihhlo avanga nun pelh awm thin hi a rilru nat thlak hle,” a ti.
Mi pahnih -khat daipelh avanga kohhran leh khawtlang chhe ta veka sawi tur erawh a ni lo, tiin, chonaah lak zawk tur a ni tih a sawi a. Central KTP leh kohhran thalai pawl dang nen tanrual a tul takzet tih a sawi a ni.
Hemi pual inkhawmah hian KTP Ramrikawn Branch leh tleirawl mi 62 chu ruihhlo laka fihlim turin an intiam a ni.