Kuhva chingtute harsatna Union MoS hnenah thlen

Dan loa kuhva ro tawlhruk avanga harsatna an tawh bakah kuhva tâm hri avanga kuhva huan siama eizawngtute harsatna chu Hachhek Bial Kuhva Chingtu Pawl (HBKCP) leh Taitesena Group YMA chuan Mizoram tlawhtu Union Minister of State for Agriculture and Farmer’s Welfare Shobha Karandlaje hnenah ziaka thlenin, an harsatna zir chianga tanpuina awm theite pe turin an thlen.
HBKCP leh Taitesena Group YMA aiawh hian Vanlalruata Pachuau chuan Union minister hi Lengpui Airport-ah hmuin, Hachhek tlangdunga kuhva tâm hri (Yellow Leaf Disease – YLD) chungchang zirchiang nei tur leh he tlangdung kuhva chinga eizawngtute harsatna sukianga tanpui turin ngenna hi a thlen.
Union MoS chuan ama awmna state Karnataka-ah pawh hetiang harsatna hi an lo tawrh nasat tawh thu sawiin, YLD-in Mizoram a tuam thleng ta leh kuhva chingtuten an tuar ve chu pawi a tih thu a lo hrilh a. District bawrhsap leh concerned department ten zirchiangin ministry lamah report siam se, theihtawp lo chhuahpui a intiam tih a hrilh.