Kuhva chingtuten harsatna thlen Sawrkarin chinfel a tum zel – HM

Hachhek, Vairengte leh Bilkhawthlir Kuhva Chingtu Pawl chuan Nilaini khan Home minister K Sapdanga an hmu a, tunhnaia kuhva hralhna chungchanga harsatna hrang hrang an tawh leh heng chinfel a nih theihna turte an thlen. Minister chuan an harsatna hi a theih ang anga chinfel sak a tum thu a lo hrilh a ni.
Kuhva chingtu pawl thu thlen zingah chhunga Burma kuhva phur check-na hmun khauh lehzuala kalpui; Vairengte leh a chhehvelah dan loa phurh luh kuhva dahkhawmna kudam la awm nual chu kumin June 30 ralhmaa man tur leh thenfai sak turin; tunhnaia sawrkar thuchhuah – certificate of origin pek dan tur chu a him tawk loin an hria a, kuhva chingtute tan thil buaithlak tak a ni dawnin an hria a, ennawn emaw tih rih loh emaw an ngen.
Kuhva tharchhuah market tha zawk leh rintlak sawrkarin ngaihtuah pui tur leh kuhva chingtute nena hma lak ho dan ngaihtuah pui tur leh; Hachhek bial-in kuhva an thar chhuah an hralhna kawng ber, Assam via Karimganj district chhunga harsatna an tawh chu Mizoram sawrkarin hma lakpui turin an ngen a ni.
Home minister chuan, sawrkar thar a pian atangin theih ang angin Mizoram paltlanga dan loa kuhva lakluh an do a, hun reilote chhungin police-te pawhin an man tam tawh hle a. Chutih rualin vawiin thlengin he sumdawnna hi a la kal reng a, police duty helin a tam zawk phei chu an kal thin em ni, tih tur a ni tih a sawi.
Chuti chung chuan sawrkarin dan loa kuhva sumdawnna titawp turin theihtawp a chhuah zel dawn tih sawiin, “Kuhva chingtu Zoram hmun hrang hrang ami leh a ching ve lem lo, an kaltlang thinna khua pawh sawrkar tha tichaka min thawhpui chhunzawm zel turin ka sawm a. Kuhva chingtuten dan loa kuhva ro sumdawnna avanga anmahni thar ngei an hralh hleithei lo ta mek hi pawi ka ti a, he harsatna hi a reh theihna turin sawrkar chuan a tih theih ang ang tih zel a tum dawn a ni,” a ti.