Tunkar Zirtawpni thlenga neih tur Horticulture Fair 2024 chu Nilaini khan Horticulture minister Prof. Lalnilawma’n Aijal Club Park-ah a hawng.
Horticulture Fair chu an department leh an thawhpui kuthnathawktute tan kawng tam taka hlawkna thlentu a ni tih Horticulture minister hian a sawi a. Thawhhona tha siamtu a nih bakah kuthnathawktute tana department hmalakna rahchhuah mipuiin an lo hmuh a, an hriatpui theihna nia a hriat thu a sawi. State pawnah Mizo thei, thlai leh pangpar thar phochhuak turin hma lak mek a ni tih a sawi a ni.
Fair-ah hian thei, thlai, pangpar leh a kaihhnawih hrang hrang, processed food nen a vaiin stall 202 an inpho a ni.
Minister hian Best Horticulture Farmer dawngtu mi 11 hnenah lawmman a sem a. Lawmman latu zingah kum 60 chuang mi pahnih an awm chu thalaite tan chona lian tak a ni, tih a sawi. An zinga Master of Computer Application zir zo hmeichhia in farming hna eizawnna atan thlang a, hlawhtlinna a hmu chho mek chu chhuanawm a tih thu a sawi bawk.
Thei leh thalai chingtute, pangpar chingtute leh a zuar thinte, thei leh thalai atanga eitur vawnthat leh sawngbawl theiha siam lama tuimite pualin Horticulture department hian kum 2012 atang khan Horticulture Fair hi a buatsaih a. Thlai chingtute leh zuar thinte tan inleitawn sak theihna hun lian tak a ni chho mek tih sawi a ni. Fair siam tan tirh kum atanga 2023 thleng khan stall neituten an hlawh chhuah hi Rs. 319,40,60 a tling tawh. Kum 2020 leh 2021 khan Covid hrileng vangin neih a ni lo thung.
-- Advertisement --
Horticulture technology, infrastructure, components, scheme etc. hmang tangkai leh hma sawn tha Best Horticulture Farmer te chu:
Hming Khua District
J. Lalhruaizela Lamchhip Aizawl
K Thandawla N Lungpher Saitual
Lalremsiama Zawlpui Lunglei
FJ Thangliana Cherhlun Hnahthial
Lalduhsangi Diltlang South Lawngtlai
Lalbiakkimi Amobyu ‘Ch’ Siaha
C Lalngaihsaka Serchhip Bazarveng Serchhip
Lalruatkima Khawhai South Khawzawl
M Kamdingliana Durzawl zau Selam Champhai
Vanlalkunga Lengte Vengthar Mamit
Lallawmkima Lungdai HmarVeng Kolasib