Kuhva hnaha plate siamna tur din

Kuhva hnaha plate siamna tur din
Mizoram Local Administration Department hnuaia Rashtriya Gram Swaraj Abhiyan kaltlanga Bilkhawthlir South-a sak, ‘Arecanut Leaf Plate Production Centre’ chu Nilaini khan LAD minister K Lalrinliana’n a hawng.
Minister chuan kuhva chin nana hmun tha tak, kuhva hmun enkawlna kawngah pawh tawnhriat nghah tawh tak Bilkhawthlira kuhva hnah hmanga thleng siam chhuahna hmun hawn theih a ni chuan intodelhna kawngah hmasawnna a thlen ngei a beisei tih a sawi a. Mizoram sawrkarin Food, Civil Supplies & Consumer Affairs department kaltlanga ram chhung ngeia tharchhuah buhfai lei tur a duh thu sawiin, Bilkhawthlir khua tharchhuah buhfai quintal 23 lei sak a nih tawh thu a sawi.
Vawikhat hman plastic tihremna’n leh Bilkhawthlir Self Help Group member-ten eizawnna ngelnghet an neih theihna’n ‘Arecanut Leaf Plate Production Centre’ chu hmang turin duhsakna a hlan a, chutihrualin tehfung hrang hrang leh a man chhiar chungchangah te ram dang siam el phaa tan la turin a chah.
Rashtriya Gram Swaraj Abhiyan kaltlanga cheng nuai 43 hmangin Arecanut Leaf Plate Production Centre, Bilkhawthlir hi 2021 December 6 khan sak tan a ni a. A in hi chhawng hnih niin square feet 930-a zau a ni. Kumin January 25 a sak zawh niin tun a khawl awm mek hmang hian kuhva plate chi 6 a siam theih a ni.