Taitesena Group YMA chuan an huamchhunga dan loa kuhva rah tawlhtute an kaltlang reng mai leh, heng thil lo enfiah tura sawrkarin a dahten an kaltlang tir reng nia ngaih chu an duh lo tih an sawi.
Taitesena Group YMA thuchhuak chuan, dan loa ramdang kuhva tawlhluh chungchangah sawrkar laipui leh Mizoram sawrkarin khapna thupek a chhuah fo hnu leh, Hachhek Bial Kuhva Chingtu Pawl (HBKCP) leh Joint Group YMA (Taitesena Group leh Langkaih Group) pawhin vawi engemawzat ramdang kuhva phur tawh lo tura ngenna thuchhuah an siam tawh chung pawhin, Hachhek tlangdungah tun thlenga dan loa kuhva tawlhruk man tur a la awm reng chu pawi a tih thu a sawi a. Heng ramdang kuhva hian Hachhek huamchhunga kuhva chingtute tan an kuhva thar ngei pawh a hralhna kawngah harsatna tam tak a thlen tih a sawi a ni.
Kuhva tawlhruk phenah hian dan phal loh thil (smuggling) lian zawk tam tak a inphumru tih nikum lama kuhva phur lirthei HBKCP-in an manah chiang takin hmuhchhuah a nih tawh thu te, hetianga dan phal loh thil tawlhrukna kawngpuia an bial chhung a tang ta mai chu pawi an tih thu te, hei hian nghawng tha lo tak leh mipui himna thlenga tiderthawng thei a nih avangin theihtawpa an do zel tur thu te a sawi.
2023 July 5 zana Zamuang Police check post-a ramdang kuhva phur lirthei pahnih check loa police-ten an tlangtir chungchangah thil diklo a awm ngei nia an hriat thu leh hetiang thil hi thleng tawh lo se a duh thu Taitesena Group YMA chuan a sawi.
‘Police checkgate /check post awm reng chung pawha foreign kuhva phurtuten checkgate an paltlang thei reng hi pawi kan ti a, dan leh hrai kengkawhtute mipui thinlunga an hlutna tlahniam zel hian nghawng tha lo a neih zel a hlauhawm a. Hetiang hi thleng nawn tawh lo se kan duh a, kan ngenna min zahsak turin kuhva tawlhtute leh thuneitute kan ngen a ni,’ a ti.
Kuhva rah phurh leh kuhva rah phurtute kaltlang tir loh an duh
Get real time updates directly on you device, subscribe now.
Prev Post
Next Post