Hachhek tlang dunga kuhva thartute’n kuhva an hralh zo thawkhat a, kum dang an pha lo nasa tih a chiang tawh.
Kuhva thartute’n kum dang an phak loh chhan hi Myanmar kuhva vang a ni a, tualchhung kuhva man (rate) a tlakhniam duai phah tih thu dawn a ni.
-- Advertisement --
Hachhek Bial Kuhva Chingtu Pawl (HBKCP) president H Biakvullura chuan kuhva hralh kawngah harsatna an tawk nasa tih a sawi a, a leitu ‘mazon’ te’n Mizoram an lut thei lo reng a, an luh theih hnu-ah pawh kuhva an ngam huai lo tih te a sawi.
“A zat tak hi la hriat loh mah se kum hmasa lama kan lei zat hmun thuma thena hmun khat vel chauh kan lei ang,” a ti a, kum dangah mazon hian bag-ah Rs 300o te, Rs 4000 tea an ngam laiin tunah chuan bag-ah Rs 1000 bawrin an hralh thei chauh tih te a sawi.
Kum dangah chuan Hachhek bial-ah cheng nuai 70 lei te an awm a, tun tumah chuan cheng nuai 20 lei an awm a rin loh thu a sawi bawk.
Kuhva hi November velah an lo tan a, a hmain Hailakandi District-a mazon-te’n an lo hauh lawk thin. Nikumah khan Hailakandi District lamah Myanmar kuhva dodalin kawng an dang a, hei hian Hachhek tlang dunga kuhva huan neitute a nghawng a ni.
HBKCP president sawi danin, Kanhmun paltlangin kuhva hi mazon te’n Hailakandi leh Patharkandi an luhpui thin a, mahse nikumah kawng an dan avangin a rah pawh an rawn en mumal thei lo. Tlai khawhnuah an rawn lut a, mahse Hailakandi lamah an hawpui theih dawn loh avangin, kawng zawng chawpa kual taka an phurh haw a ngaih avangin kuhva pawh an lei huai ngam ta lo a, a neitute lahin hralh loh an theih si lo a, tlawm te tein an hralh ta a ni.
“Myanmar kuhva a ni mai kan buaina chu. Myanmar kuhva kawng an dan avangin keini min rep ta a ni,” a ti a, tunah chuan Myanmar kuhva phurtute hi an bial lamah an kal ta lo nia an hriat thu a sawi.
“Kumin hi keini bialah chuan sum a vang dawn a, kum danga kan lakluh ang kan pha tlat lo a,” HBKCP president chuan a ti a, “Kuhva hralhna pawisa han dawn pawh a chakawm loh rum rum alawm. Mahse an ngamna zata hralh lo thei lo kan ni bawk si a,” a ti bawk.