Kuki group te khauh bur zui zel

Manipur Governor Anusuiya Uikey chuan Union Home Minister Amit Shah hmuin, Manipur a tlawh hnuah thui taka boruak a pangngai tak thu a hrilh.
Uikey chuan Home Minister hnenah hian State chhung dinhmun a hrilhfiah tiin Raj Bhavan thuchhuah chuan a tarlang a.
Shah hian May 29 atanga June 1 inkar chhung khan Manipur a tlawh a. May 3-a Kuki community leh Meitei community te inkara buaina chhuakah tun tlengin mi 131 velin nunna an chan phah tawh a ni.
Hetih lai hian Kuki group te thung chuan Manipur Chief Minister N. Biren Singh, tun buainaa a meizangthlaptu bera an ngaihin remna awm theih nana hma a lakna chu an duh loh thu an sawi a.
A hma pawhin peace committee Governor-in a kaihhruaia Biren Singh pawh telna chu an lo hnawl tawh bawk a. June 25 khan Biren Singh chan Delhi-ah Home Minister a hmu a, chutah chuan remna a awm theih nana tha thara chet la tura hrilh a ni.
Biren Singh chuan Kuki community-te chu a hnampui anga a ngaih thu sawiin hei vang hian remna a awm theih nana inbiakna tharthawh ni se a ti a.
Thawhlehni khan hmeichhe pawl Meira Paibis te leh Coordinating Committee on Manipur Integrity, civil society group lian tak te chu a hmu bawk a. Women group te hi Army te chuan armed rioters te puitu leh Army operation tibahlahtu angah an ngai ve thung.
Committee on Tribal Unity-Kangpokpi District te chuan Chief Minister ban a nih loha President’s Rule puan a nih loh chuan peace talk neih an duh dawn lo an ti a. Hei mai bakah hian seperate administration an ngiat zui zel bawk a.
Governor pawhin Defence Minister Rajnath Singh biain Army tena relief leh rescue operation an neihte fakin State administration an puihnaah lawmthu a hrilh bawk a ni.
Hetih lai hian Indigenous Tribal Leaders’ Forum te chuan June 26-a Manipur sorkarin “no work no pay” circular a tihchhuah chu an hnawl thu an sawi bawk a.
“He thupek hmanga sorkar hnathawkte an hnathawhna hmuna kal ngei tura tihna hi thil awm ang lo a ni,” tiin an sawi.
Forum te chuan tribal community te State sorkar hnathawkte chu Imphal Valley-ah May 3 atang khan enhranna awmin an chenna in, thil neih te, mimal documents pawimawhte chu ruksak leh halsakin an awm a, hnathawka kal thei tur pawha siamin an awm lo an ti a. Hei vang hian Union government chu thupek siamte hnukkir turin an ngen bawk.