BJP ten UCC kalpui ngei tum?

Prime Minster Narendra Modi chuan India-in Uniform Civil Code (UCC) a mamawh tia sawiin India chu ‘community hrang hrang tena dan hrang an neih’ ang rengin dual system anga kal reng theih a ni lo tiin Bhopal-a BJP booth-level worker te nena inkawmhona an neihnaah a sawi a, hei hi a sorkarin UCC kalpui ngei an tumna chiang taka tarlanna anga ngaih a ni.
UCC hi inhnialna nasa siam tak niin minority community hrang hrang tena an helh em em ni thungin State panga inthlang mai tur leh kum 2024 Lok Sabha inthlan nakum lawka neih a ni turah BJP te chuan thupuia neih an tum ngei nia ngaih a ni a. Karhnih vel kalta lawk khan 22nd Law Commission of India chuan UCC chungchangah inrawnkhawmna neih that leh ni se an lo ti tawh bawk.
Modi thusawiah hian Muslim community te chu political party te chuan anmahni tichhe zawngin an tur reng tiin a sawi bawk a.
“Kan thawhpui, India rama Muslim te hian anmahni hlawkna atana tichhe zawnga an enkawl dan an hriatfiah a ngai a ni. Tunlaiah chung mite chuan Uniform Civil Code hmangin an tur mek a. Zawhna ka neih chu chhungkua pakhatah member pakhat dan hranpa, a dang tan dan dang awm se chu chhungkua chu a mumal thei dawn em ni? Chutiang dual system ang chuan ram enkawl theih a ni em ni,” tiin zawhna Modi chuan a siam bawk a.
Political party thenkhatte chu Muslim community te chu an hamthat nana remchanga hmangah puhin a bik takin Pasmanda Muslim te an ni zual tiin Prime Minister chuan a sawi bawk a. Khua leh tui te chuan dikna chanvo inang nei vekin chu chu Constitution pawhin a tarlan a ni tiin a sawi bawk.
“|hiante u, nasa taka puhin kan awm a, mahse, thudik tak chu Muslim te tana tawng chhuak intite hian Muslim-te hamthatna duh tak tak se chuan Muslim unaute hi zirna lamah te, hna lamah te hnufumin an awm hauh lovang. Supreme Court chuan tum tam tak Common Civil Code siam rawh u a ti a, mahse heng vote-bank a riltam te hian an remti lo” tiin UCC chungchang a sawi a.
Ram temple sak a ni tawh a, article 370 nuaibo a ni tawh a, UCC chu BJP tena ‘core issue’ tia an sawi an la chinfel loh awm chhuna ni ta a.
BJP te chuan Jana Sangh an nih lai atang tawhin UCC nuaibo duh an ni a. Uttarakhand a BJP sorkar chuan UCC kalpui turin expert panel a din tawh a, Madhya Pradesh a Sivraj Singh Chouhan kaihhruai sorkar kumina inhtlan hmachhawn mai tur pawhin UCC chu kalpui an tum thu an sawi bawk.
Sorkar chuan UCC kalpui tum bur mahse zinkawng khirhkhan tak a hmchhawn ngei dawn thung a. AICC general secretary K.C. Venugopal chuan Modi chuan thil pawimawh Manipur tharumtyhawhna thleng mek te, retheihna, inflation leh unemployment te ang chu a sawi lang ngai lo tiin a sawi a.
“Modi hian retheihna, thil man sang leh hna vang te hi a sawi hmasa tur a ni. Manipur buai vanglai pawhin engmah a sawi ngai lo va, nmi 60 chuang Manipur a buai turu pawhin a ngawi a. Thumal khat pawh sawi lovin remna awm se ngenna pawh a siam hek lo. chung issue atang chuan mipui rilru kaihpen a tum zawk a ni” tiin Venugopal chuan a sawi a.
Chhattisgarh Chief Minister Bhupesh Bagel chuan UCC chungchanga inhnialna chu Hindu-Muslim thlirna atang ringawta teh chi a ni lo a ti bawk a. “UCC hi kalpui a nih chuan tribal te chungah eng nge thleng ang? Tradition leh thil kalpui dan an nei sa a ni. Kan ramah hian community tam tak, caste, sakhua leh region avanga danglam tam tak kan awm a, chungte chu uniform law kan hman hma ngeiin kan chhut dip dep a ngai,” tiin Baghel chuan a sawi.
Rashtriya Janata Dal leader Manoj K. Jha pawhin, “UCC chungchang a sawi hmain PM hian 21st Law Commission kha a zirchiang hmasa tur a ni,” a ti bawk a. UCC hman hma ngeiin tribal community tena tradition an neih hrang hrangte ngaihtuah hmasak a ngai a, Prime Minister ngei pawh hian Hindu sakhuana chhunga thil tih dan inang lo tak tak te pawh a hrefiah ngei tur a ni, tiin a sawi bawk.
Janata Dal (United) secretary general K.C. Tyagi chuan Prime Minister-in UCC inthlan hmaa a aupui chiam hi inthlannaa communal card hman tuma a sorkar hlawhchhamna thup a tumna a ni, tiin a sawi bawk.
All India Majlis e Ittehadul Muslimeen leader Asaduddin Owaisi chuan, “Modi an UCC a sawi hian a tum ber chu Hindu Civil Code niin Islamic kaihhnawih reng reng nuaibo a tumna a ni a. Ka zawhna chu Hindu United Family tax exemption, Special Marriage Act emaw State 11 te speciail status pekna an zinga northeast state paruk telna Article 371 te hi a nuai bo thei ang em. Punjab ah Sikh te hnenah UCC a sawi ngam ang em?” tiin zawhna a siam thung.
Tun hnai lawkah pawh Khasi Hills Autonomous District Council (KHADC) te chuan resolution siamin UCC chu an pawm loh bur tur thu sawiin tribal pawl dang te pawh ding nghet tlat turin an ngen bawk a.
Tuna PM Modi-an na taka UCC chungchang a sawi avang hian hun rei lo te hnuah Centre chuan UCC chu kalpui ngei a tum nia ngaih a ni bawk.