Kuki MLA-in Mizoram chungah lawmthu sawi

“Mizoram hi Zo hnahthlakte Jerusalem a ni”
Manipur MLA, Zo hnahthlak Kuki tlangval Paolienlal Haokip chuan Mizoram chungah lawmthu a sawi a, “Tuna kan buainaah Mizoram hian min khawngaih a, min support a, kan lawm em em a ni,” a ti.
Mizoram chu hmun hrang hranga Zofate tan inpui a ni a ti a, “Zo hnahthlakte tan Jerusalem a lo ni,” a ti.
Paolienlal Haokip hian Mizoram sorkar, tlawmngai pawlte leh mipuite chungah lawmthu a sawi a, “Zo hnahthlakte kan lawm,” tiin, “Kawng hrang hrangin min pui,” a ti bawk.
Mizoram sorkarin Manipur-a Zo hnahthlakte dinhmun a hriatthiampui tih a sawi a, “Mizoram chief minister-in theihtawp a chhuah a, Manipur chief minister lehkha a thawn a, Manipur chief minister hnenah hian kan unaute an ni tiin a sawi,” a ti a, Mizoram sorkarin remna a awm theih nan theihtawp a chhuah tih a sawi bawk.
MZP leh YMA chungah lawmthu a sawi a, “NGO te chungah kan lawm a, MZP leh YMA te’n kan tan theihtawp an chhuah a ni,” tiin, “Mizoram mipuiin kan dinhmun an hria a, min support a, min pui a, Mizoram mipui chungah Manipur-a Zo hnahthlakte kan lawm,” a ti.
“Mizoram chu Zo hnahthlakte Jerusalem a lo nih hi,” a ti a, Myanmar-a Zo hnahthlakte’n harsatna an tawhin Mizoramin a pui a, Bangladesh-a Zo hnahthlakte’n harsatna an tawhin Mizoramin a pui a, hmun danga mite pawh Mizoramin a pui thin a, tunah pawh Manipur-a Zo hnahthlakte chu Mizoramin a pui tia sawiin, Mizoram anga Zo hnahthlakte pui zel thei hi an awm lo tiin a sawi.
Manipur-a buaina hi a rei ang em tih sawi thiam a har thu leh, engtia rei nge an buai dawn tih chu hriatthiam a har thu te a sawi a, tunah chuan tharum thawhna a zia telh telh tih a sawi.
Zo hnahthlak mi eng zatin nge nunna chan tih pawh hriat a har tih a sawi a, mitthi ruangah tu ruang nge tih hriat theih loh te pawh a awm tia sawiin, “Hundred plus chu an ni ang,” a ti.
Tun tum buainaah hian Manipur-a Zo hnahthlakte an inlungrual a, an tangrual tih a sawi a, “Zo hnahthlak zawng zawng an tangrual a, unity a awm,” a ti.
Manipur-ah Zo hnahthlak MLA 10 an awm thu leh, pahnih chu minister an nih thu te a sawi a, tun hnaiah inhmuhkhawm an tum a, mahse buaina hi a lo chhuak a, an inhmukhawm hman ta lo tih a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More