Tlanchhia an tlem telh telh

Manipur buai vanga Mizorama tlanchhia an tlem telh telh a, a tir lam angin an chhuak hum hum tawh lo tih thu dawn a ni.
Churachandpur atanga thu dawn danin, Mizoram pana tlanchhuak hi an tlem telh telh a, tuna chhuakte pawh hi chhuak lo thei lo an ni hlawm ang. Hrisel lohna thil avanga chhuak te, chhan dang tha tak vanga chhuak an ni tlangpui tawh.
Manipur-a Zofate khawpui Churachandpur-ah hian chhuak lo turin an inngen a, thalai, mipa phei chu Churachandpur chhuahsan lo turin an inngenin an inbeisei. An inngenna hian ngaih pawimawh a hlawh tih thu dawn a ni.
Manipur sorkarin tun tum buainaah hian internet an titawp a, Churachandpur-ah pawh whatsapp an hmang thei lo. Chanchin inhrilh a har a, mahse curfew karah vantlang inkhawm an ko thei. Chutah chuan tlanchhuak lo tur hian an inngen hlawm.
Zo hnahthlak chi bing hrang hrangte’n thalai pawl an nei a, chung pawl hrang hrangte chuan vantlang inkhawm kovin tlanchhuak lo turin an inngen thin. Hriat theih chinah YMA lamin mipa kum 17 leh kum 60 inkarte tlanchhuak lo turin an ngen a, Young Paite Association chuan mipa kum 18 leh kum 50 inkar an ngen.
An inngenna hi a hrana bawhzui a awm lo a, indan leh inven emaw pawh a awm chuang lo. Mahse an zawm tha nia sawi a ni.
An buai laia thalai, mipa an chhuah duak chuan a buaithlak thei ang tih an hlauh avanga hetianga inngen hi an ni tih thu dawn a ni.
Churachandpur hi an ralmuang telh telh a, curfew te puang mah se sipai leh police an duty chuang lo. Mizoram atangin buhfai a thlen avangin ei leh barah an buai rih lo nia hriat a ni.