Kuki pawlin an khua paltlang lo turin Meitei vau

Kuki pawlin an khua paltlang lo turin Meitei vau
Kuki pawl chuan Manipur hmar lam district-a May 20 leh 24 inkara state puma hman tur, Shirui Lily Festival 2025 chhim turin Meitei-te chu an khua paltlang lo turin an vau.
State sorkarin pangpar vâng tak, mang mai hlauhawm ni bawk, Tangkhul Naga tribe leh Naga hnam dangte chenna, Ukhrul district tlangrama to thin, an state flower, Shirui Lily thehlar nan kût hi an buatsaih a ni.
‘Kuki Zo Village Volunteer – Eastern Zone’ chuan thuchhuah siamin Naga tribal-te chu kût hlim taka hmang turin duhdakna an hlan a, hetih rual hian Meitei-te chu Ukhrul district panna kawnga Kuki khua paltlang lo turin an ti bawk.
Kuki pawl hian Pathianni khan Meitei vauna thuchhuah hi an siam a, “Meitei-te chu engtik hunah pawh kan awmna lo lut emaw, lo kaltlang lo turin kan ti a. He thil hi zawm lo an awm a nih chuan an chungah engpawh thleng anmahni mawh a ni ang,” an ti.
Vauna thu chhuah a nih mek lai hian Manipur Director General of Police Rajiv Singh chuan Ukhrul hi ni hnih tlawhin Shirui Lily Festival hman tura venhimna dinhmun a enpui.
Manipur hi President’s Rule-a awm mek a ni.
‘Kuki Zo Village Volunteer – Eastern Zone’ hi ‘Village Volunteers Eastern Zone’ (VVEZ) nena hrang an ni.
VVEZ hian Shirui Lily Festival chungchangah engmah thuchhuah an la nei ve lo va; mahse, Manipur Governor Ajay Kumar Bhalla-a’n dan lova ralthuam kawl leh ruk zawng zawngte thuneitute hnena hlan let vek tura a tih hun tawp, March 8 khan video siamin an pawl mi pasarih, an hmai tuam vek, sipai kawr ang hate chuan AK series leh assault rifle dang keng chungin an thil phut, inawpna hran an hmuh hma chu an ralthuam an tung dawn lo tih an sawi a ni.
Manipur State Transport chuan festival hman chhunga state khawpui, Imphal atanga tlangram khaw mawi tak, Ukhrul-a mi pan turte chuah hun a puang tawh.
Tangkhul Naga social worker Asang Kashar chuan Kuki pawlin vauna an tichhuak hi tha a tih loh thu a sawi a. “Manipur khua leh tuite tan chona a ni a, Kuki-te hi muanna do zawngin an che a ni,” a ti.
Tar lan tawh thin angin Kuki leh Meitei te hi May, 2023 atang khan ram neihtu inchuhna leh politics thil avangin an inbei a. Mi 260 chuang thi tawhin mi 50,000 dawn baihvaiin an awm phah mek.